Mih ka huri hura ha Khanduli ba kthong ki Karbi ïa ki shi kpa shi khun katba dang rep lyngkha

Jowai, Jymmang, 11: Ka huri hura ka la khie biang hapdeng ki jaidbynriew Pnar kiba sah ha ka shnong Khanduli bad ki Karbi kiba sah Karbi Anglong ha ka sngi Palei.
U Waheh Shnong jong ka shnong Khanduli u Bah Y. Nongspung ha ka jingïakren bad u Mawphor u la ïathuh ba ha ka por 2:00 baje eiei nohphai sngi katba ki shi kpa shi khun ki dang pynleit jingmut ha ka jaka rep kaba don ha shnong Khanduli kumba phra ngut ki Karbi kiba kieng da ki tiar pynmynsaw ki la kthong ïa kine ki arngut.
U la ïathuh ba kine ki arngut ki shipai shi khun kiba la lait phet da ka said ynda poi hapoh shnong ki la pyrta jingïarap bad dei ha kum kane ka por ba ki paidbah nongshong shnong jong ka Khanduli ki la mih buk ban kthong kylla ïa ki phra ngut ki Karbi.
Katkum ka jingïathuh jong u Bah Nongspung, ki Karbi kiba phet krad sha la ka jong ka shnong ki la leit khot briew ban ïarap ïa ki hadien ba ki la shah kthong ha ki paidbah ka Khanduli. Dei na kane ka daw ba ki paid Pnar ka Khanduli bad ki paid Karbi ki la ieng ban ïa pyni bor markylliang kat haduh ba ka la mih ka jingïakajia hynrei kat haduh ba la thoh ïa kane ka khubor kam shym la don kano kano ka jingjia ba sngewsih.
Kane ka jingïakynad hapdeng ki jaitbynriew Karbi bad ki Pnar ka la nang rhem katba nang mih ki sngi naduh ba ka Karbi Anglong Autonomous Council (KAAC) ka la buh ïa ka khyrdop khrong khajna ha khappud bad ka shnong Khanduli ba la kam ruh ba ka dang hap hapoh u pud u sam jong shnong Khanduli.
Dang shen ha ka jingïakren hapdeng ki bor synshar ka West Jaiñtia Hills District bad ka Karbi Anglong ki la mynjur ban bthah ïa ka Karbi Anglong Autonomous Council (KAAC) ban weng noh ïa ka khyrdop lum khajna.
Kat haduh ba la thoh ïa kane ka khubor la ïoh jingtip haduh ka por 8:00 baje mynmiet ka huri hura ha khapppud ka shnong Khanduli bad Karbi Anglong ka dang kyan bha bad ïa ka jingïakynad la lah ban pynjaijai da ki bor synshar shnong jong ka Khanduli.
U Waheh Shnong ka Khanduli u la ïathuh ba ki paidbah nongshong shnong ki la rai ban pynlong da ka jingap miet namarba ki sheptieng ïoh ba ki paid Karbi ki lah ban wan hiar thma ïa ka shnong Khanduli ha ka por mynmiet bym poi pyrkhat.
Ka thymmei khubor ka la ïathuh ba wat ka kali jong ki Pulit ka West Jaiñtia ka la shah kawang maw ha ki paid Karbi.
Hynrei ki lad khubor ki la ïathuh ba ka la don ka jingshah shoh uwei u Karbi ha ki briew ki bym tip namar ka jingkren heh bad ka jingkren pyndom jong u ïa ki paidbah ha Khanduli kaba la poi sha ka jingbitar ki paidbah kiba la shoh la dat ïa u haduh ba un da mynsaw.