Ka dei tang ka nia elekshon ba ngin kynjat noh ïa ka UDP hadien ka elekshon Sohïong: Sniawbhalang

Shillong, Jymmang 11: U Nongïalam ka NPP uba long ruh u Symbud Myntri Rangbah ka Jylla Bah Sñiawbhalang Dhar ha ka sngi Palei, u la kyntait ïa ki khubor ba kam ba kan sa don ka jingkylla (kyntait noh ïa ka UDP) ha ka Sorkar Meghalaya Democratic Alliance (MDA)-2 hadien ka elekshon ha Sohïong.
Lah ban sakhi ba na ka liang u Symbud Myntri Rangbah ka jylla uba long ruh u National vice President ka NPP u Bah Prestone Tyngsong ha ka jingïalap elekshon ha Sohïong u la maham lupa ba kan don ka jingkylla ha ka sorkar MDA hadien ka elekshon bad u la ai jingmut ïa ki party kiba snoh ha ka bos ka NPP ba kin hiar lupa shuwa ban shah kynjat.
Haba ïakren sha ki lad pathai khubor u Bah Sñiawbhalang u la kyntait ba kan don ka jingkylla, ‘namar ka jingïalap elekshon kan kut kumto hi bad kito ki jingkren jong ngi ki dei shi bynta ka jingïalap elekshon,’ u la ong.
U la ong ruh ba kumba long mynta ka jingïatreilang ha ka Sorkar MDA-2 ka ïaid beit bha bad ka don ka jingsngewthuh jingmut kaba khlaiñ hapdeng ki paralok ba don ha ka sorkar.
Haba kylli halor ka jingïohi jong u ïa ka elekshon, u Bah Sñiawbha ula ong, “To ngin ap ïa ka sngi ñiew vote” bad bynrap “Ka NPP kan kam ba ka NPP kan jop bad ka UDP ruh kan kam ba kan jop bad kane ka dei ka rukom ha ka elekshon”.