U Bah Vincent u kwah ïasoh NPP: Mukul

0

Shillong, Jymmang, 09: U nongïalam jong ka All India Trinamool Congress u Mukul Sangma uba long ruh u Myntri Rangbah barim jong ka Sorkar Jylla ha ka sngi Palei u la kynnoh ba ka jingïaroh jong u President ka Seng Congress u Bah Vincent H Pala ban tehlakam ïa ki ‘High Level” ka paw kumba u kwah ban leit ïasoh sha ka National People’s Party (NPP).
Dang shen u Bah Pala u la ïaroh ïa u Symbud Myntri Rangbah ka Jylla u Bah Prestone Tynsong uba peit ïa ka tnat Kam Pohing uba la kam ba ka High Level ba la ju kynnoh ba ka donkti ban pynïaid ïa ka jingkhaii be-aiñ ïa u dewiong ha ka jylla, kam don shuh.
“Nga ïaroh ïa u Bah Tynrong uba la pynkylla ïa ka “high level” sha ka “zero level” kumba ka long mynta. Naduh ba u Bah Tynsong u la shimti ïa ka tnat Home (Police), ka ‘high level’ kam don shuh,” ong u Bah Pala.
Haba kylli halor kane, u Sangma u la ong, “kine ki dei ki politishian ki bym don ka raiñ ka rem. Ki ïoh jingmyntoi na baroh kine ki kam be-aiñ da kaba ïalehkai ha rynsan pyni ba ka biang beit lada phi ong ba u ketli u ïong (bad) u ketli un ong ïa u khiew uba ïong.”
“Kaei kaba u (Bah Pala) u la kren ha shwa ka elekshon? Bad Mynta u la pyrshang ban kdat ïa ka jingkren kaba paw kumba u la kwah ban leit ïasoh sha ka NPP. Lehse kane ka dei ka daw ba ka jingkren jong u ka long ban weng ïa ki jingeh kiba shah hakhmat. Ngam don kano kano ka daw ban dang artatien shaphang kata ka jingthmu hynrei sa peit bha ïa kaei kaba nga la ïathuh ïa phi,” ong u Myntri Rangbah barim ka jylla.

Leave A Reply

Your email address will not be published.