Mynta ka sngi yn pynhap pyrda noh ka KSU Nongthymmai Circle ïa ka Maitshaphrang Khasi Badminton 2023
Shillong, Naitung 13: Ka KSU Nongthymmai Circle ha ryngkat ka Tramline Badminton Academy ka la pynkhreh ban pynhap pyrda ïaka lympung lehkai kaba la tip da ka Maitshaphrang Khasi Badminton 2023 mynta ka sngi ka 14 tarik u Naitung bad ka jaka kan long hapoh ka Nongthymmai Indoor Stadium ha ka por 4 baje nohphai sngi.
Kumban shu pynkynmaw, ka KSU Nongthymmai Circle ha ryngkat ka Tramline Badminton Academy ka la ïoh ban plie pyrda ïa kane ka lympung lehkai dei naduh ka step jong ka 11 tarik u Naitung da u Bah Bawan Khyriem President jong ka Nongthymmai Sports and Cultural Club u ba dei ruh u Rangbah shnong jong ka Nongkhyriem ha ka jingïadon ryngkatlang bad ki Rangbah shnong,Rangbah dong ,seng samla shnong kiba hap hapoh ka jylli treikam jong ka KSU Nongthymmai bad ki nongkitkam ka Nongthymmai sports club.
Hynrei mynta ka sngi ka 14 tarik na ka liang jong ka KSU Nongthymmai Circle ha ryngkat bad ka Tramline Badminton Academy kan sa ïoh ban khylliap noh ïa kane ka lympung kaba la bynta ha ki kyrdan bad ki thup ïakhun bapher bapher.
Ha kane ka sngi yn sakhi ïa ki jingïalehkai final kaba la pynhreh ban sdang naduh ka por 1 baje ka nohphaisngi ha ka thup kyrdan jong ki khynnah ba dang hapoh ka 15 snem ka rta shynrang bad kynthei (U15 singles boys and girl), kyrdan ïalehkai kiba hapoh 19 snem na ka bynta ki shynrang bad ruh kynthei (U19 singles boys and girls), bad kine ki hap ha thup ïakhun para marwei, nangta ki jingïalehkai mar arngut kyrdan khynnah ba dang hapoh 15 snem kynthei bad shynrang (U15 doubles boys and girls), kyrdan ïalehkai Under 19 jong ki shynrang, bad ruh kynthei & khleh (U19 doubles boys, girls & mix).
Ka jingïakhun para marwei hapdeng ki shynrang bad kynthei kiba la rangbah (Mens and womens senior single), ka Senior mixed double, ka Veteran 45+ singles men and women, ka Veteran doubles men and women, ka Veteran mixed doubles.
I samla Lambokstarwell Marngar, President KSU Central Executive Council in long kum i kongsan ha kane ka sngi khylliap pyrda bad i Dr. C.O. Rangad, Senior Vice President jong ka Meghalaya Badminton Association i wan kum i symbud kongsan ha kane ka sngi.