Mynta ka sngi Meghalaya pyrshah ïa ka Karnataka ha ka phainal Santosh Trophy
9 tylli ki shnong yn pynïeng Giant Screen ka KSU
Shillong, Lber 03 : Ka Khasi Student Union (KSU) lashai ka sngi Saitjaiñ kan pynïeng giant screen ha ki khyndai tylli ki shnong ban pyni ïa ka jingïalehkai phainal Santosh Trophy ha kaba ka Meghalaya kan ïakhun pyrshah ïa ka Karnataka ban ïaknieh ïa ka nam lahduh.
Ka jingïalehkai phainal jong katei ka lympung Santosh Trophy kan sdang ha ka por 9 baje mynmiet ha King Fahd International Stadium, Riyadh, Saudi Arabia. Ki jaka ba ka KSU ka la pynbeit ban buh ïa ki Giant Screen, ki kynthup ha Mawlai (Basic School, Nongkwar), Mawkasiang (ha phyllaw ophis Shnong), Laban (Ïewdak), Lawsohtun Block 5, Nongmensong (hajan SBI), Ïew
Pohkseh (habar ophis jong ka KSU Nongthymmai Circle kaba don hajan Children’s Hospital), Mawkyrwat (ha phyllaw Ferdinand Iawphniaw hajan Post Office), Umsning (Town auditorium) bad ha Nongpoh (Sajer).
Hashuwa ka jingïakhun phainal hapdeng ka Meghalaya bad Karnataka, ka Punjab bad ka Services kin ïaknieh ïa ka nam ba lai. Kum ban pynkynmaw hangne ba ka Meghalaya ka la ïoh ban rung sha ka phainal jong ka Santosh Trophy hadien ba ka la lah ban pynphai kylla da kaba pynliem da 2-1 kol pyrshah ïa ka Punjab ha ka jingïakhun semifinal, katba ka Karnataka ka la pynliem da 3-1 kol ïa ka Services.