Shillong, Nailur 23: Ka Meghalaya Football Association (MFA) ka dap da ka jingsngew sarong ban pynbna ba ka Shidalin L Marshillong ka la ïoh ïa ka kyrdan kum ka Category 5 national assistant referee, kumba la pynbna da ka All India Football Federation (AIFF) hynnin ka sngi Ba-ar.
Ka Shidalin ka la ïaleh ïa ka eksamin Level 5 upgrade practical na ka bynta ki kynthei bad ka la pyndep ïa kane ka test ryngkat bad arngut kiwei pat ki nongpynïaid jingïalehkai lane official na Nagaland. Kumta ka la kiew kyrdan sha ka Category 5 da kaba treikam mardor, ong u S Suresh, u Khlieh duh jong ki Referee ha ka AIFF.
Ki referee bad ki assistant referee kiba la ïoh ïa ka kyrdan Category 5 ki lah ban pynïaid ïa baroh ki jingïalehkai ha ka kyrdan jong ka ri (national-level).
Kumba ka paw, ka Meghalaya Football Association ka aiti lut ban ïatreilang bad ka sorkar Meghalaya, na ka bynta ban kyntiew ïa ka kam ïalehkai ha ka jylla, naduh ki kyrdan ïalehkai kiba dang rit haduh kiba la heh, kumjuh ruh ïa ki lympung ïalehkai jong ki kynthei, ha ryngkat ka jingpyntbit ïa ki nongpynïaid ïalehkai (match official) bad ka jingpynlong ïa ki lympung ïalehkai phutbol ba ha khlieh duh.
Ha kine ki khyndiat bnai lai ngut kiwei pat ki official ki la ïoh ruh ïa ka kyrdan Category 5 – ka Pipilmoris Wanniang kum ka Referee, u Pynskhemhame Mawthoh kum u Referee bad u Jespar Syiemlieh kum u Assistant Referee.
