Shillong, Nailur 23: Ka Nongkseh ka la pynthikna ba ka dang don ha ka jingïakhun ban ïaknieh nam lahduh ha ka Shillong Premier League 2026 da ka jingjop kaba 2-0 pyrshah ïa ka Rangdajied United hynne ka sngi Balang ha madan First Ground-SSA Stadium.
Ki kol na u Dawanchwa Challam (66’) bad u Aenam Jyrwa (85’) ki la biang pura ïa ka Nongkseh ban khur ïa ka jingjop bad pynneh pynsah ïa ka jingkyrmen ïaknieh nam lahduh.
Ka jingjop ka la kyntiew ïa ka Nongkseh sha ka kyrdan ba saw ha ka miej, bad mynta ka la kamai 10 poiñ, kaba duna lai poiñ na ka Langsning kaba lamkhmat ha khlieh duh. Katba ka Rangdajied ka sahkut ha ka kyrdan kaba hynñiew da 7 poiñ.
Ka Rangdajied ka la nang kham kiew ha ka jingïalehkai bad ka la lah ban shan tyngeh ïa la ka jong ka kol haduh shi kynta shuwa ba kan shah thep.
Ka kol ba nyngkong ka la urlong hadien ba u Dawanchwa u la tehlakam jai ïa ka bol ba la pashat sha u, shuwa ba un pyrshang da kaba jam da ka kjat kadiang ban pynïaid lait ïa uwei u rangïalehkai ka Rangdajied bad ruh ïa u nongap-kol.
Katba ka kol kaba ar kadei hi la bok hadien ba la bol pashat na liang kamon ka la ïaid lait ïa baroh ki rangïalehkai jong ka Rangdajied, nangta ka la hap ha ki kjat jong u Aenam, uba la pyrshang da kaba suk sha kol.
Kham hashwa, ha ka kylla step, u Chesterpaul Lyngdoh u la shah kyntait ban thep ïa ka kol kaba nyngkong hadien ba u rangap-dien ka RUFC, u la lah ban khanglad biang por ïa ka bol shuwa ba kan jam tam ïa u laiñ kol, katba ka free kick ba u Hardy Cliff Nongbri, u la pashat hapoh phyllaw kol ka la shu sepei namar ym shym la don satia mano mano ban thep. Kine ki dei ki kabu ba bha tam jong ka Nongkseh ha ka kylla step. Na ka bynta ka Rangdajied, ka la ïoh bun tylli ki korner hynrei ka la pynsyrwa kai ïa kawei pa kawei naki.
Shuwa kane ka jingïakhun, ka Rangdajied ka la jop ar sien lynter ki jingïakhun ba la dep hynrei kine ki long pyrshah ïa ki kynhun (ka Laitkor bad ka Nangkiew Irat) kiba kham duna ban ïa ka Nongkseh bad ka RUFC kam shym la lah ban bteng ïa kane kajuh ka jingjop hynne ka sngi – kane ka dei ruh ka jingïalehkai ba nyngkong jong ki khlem da ïoh ban thep kol.
Mynta ka sngi, ka Shillong Lajong, kaba wan kyrdan ba lai, kan aireng pyrshah ïa ka Laitkor ha ka por 3 baje nohphai sngi.
