Shillong, Lber 03 : Ka kynhun ïalehkai phutbol jong ka Meghalaya ka la nang ïoh mynsiem shuh shuh hadien ba u kapten jong ka u Fullmoon Mukhim u la wanphai sha la ka jong ka kynhun hashuwa ban ïakhun phainal pyrshah ïa ka Karnataka ha ka Santosh Trophy (78th National Football Championship for Santosh Trophy) ha ka sngi Saitjaiñ ha King Fahd International Stadium.
Ka Meghalaya kaba dei ka kynhun ka ka thaiñ shatei lam mihngi ka ri India kan sa mih madan da ka jingangnud ban ïoh rah ïa ka nam lahduh. Na ka liang u Bah Khlaiñpyrkhat uba dei u coach u la pynpaw ba kam don ka jingartatien ba ki khynnah kin ïoh ban ïalehkaki bha ha ka phainal.
“Kumba nga la kren shuwa ka jingïakhun semifinal, ban poi sha kane ka kyrdan hangi ngi sngew ba ka la long kum ka jingjop, kumta ngin ïai bteng ban ai mynsiem ïa ki khynnah da kaba bthah ïa ki ba kin leit ban ïalehkai da ka jingkmen bad ban jop ïa ka jingïalehkai. Kata kaba ngi ju ong bad ai mynsiem na ka bynta jong ki,” ong u Bah Khlaiñ Pyrkhat ha ka sngi Thohdieng shuwa ban poi ka sngi ïakhun phainal.
U Bah Khlaiñ u la ong ruh ba ka Karnataka ka dei ka kynhun kaba khlaiñ bad ba ka Meghalaya kan pyrshang ban ïalehkai bha ha ki liang baroh bad hooid, kumba u kapten jong ngi u la ong ba ka Karnataka kadei ka kynhun kaba khlaiñ, ki don ki nongïalehkai kiba la kham tbit. Kiba bun ki player kidei kiba ïalehkai ha ka Bangalore League kaba dei kawei na ki league ïalehkai ba biang bha ha India. Hynrei ngi la ïoh ban peit bha ïa ka rukom ïalehkai ka jong ki watla ki don ki bynta ba katei ka kynhun ka tlot, hynrei ngin pyrshang shim kabu ïa katei ka jingtlot jong ki.
Ka Meghalaya ka la nang kham ïoh mynsiem hadien ba u Fullmoon Mukhim uba dei ruh u kapten u la lah ban wanphai ha ka jingïakhun phainal. U Fullmoon Mukhim u la duh ban mih madan ha ka jingïalehkai semifinal pyrshah ïa ka Punjab na ka daw ka jingmynsaw.
“Baroh ki player ki long kiba biang, bad wat u kapten ruh kumjuh. Lashai un sdang ban mih madan bad sngew-kmen ban ïohi ba lashai ka sngi ngin ïoh ban ïalehkai pura kum kawei ka kynhun,” ong u Bah Khlaiñ.
Kumba long ka Karna-taka, ka Meghalaya ruh ka la shah thep shi kol ha baroh ki jingïalehkai. “Hooid ngi la shah thep kol, kumba long ha ka jingïalehkai bad ka Punjab da shi kol. Hynrei kane ka pynshisha ba ki player jong ngi ki long kiba biang ban wanphai da kaba pynphai kol.”
“Ha ka round kaba nyng-kong ba ngi ïakhun pyrshah ïa ka Orissa ka jingïalehkai ka long da 2-1. Lada ngi la rem ha ka jingïalehkai ngin ym ïoh rung mynta u snem. Bad ha ka kylla ïalehkai kaba khatduh, ngi shah thep shi kol bad ka Bengal, hynrei ngi la wanphai da ka jingkhlaiñ. Bad ha ka jingïalehkai semifinal ruh ngi shah thep shi kol bad ngi la ïoh ban pynphai. Kine kidei ki jingpynshisha ba ki player jong ngi ki long kiba biang bad kiba la pynkhreh na ka bynta ban ïakhun pyrshah ïa ka Karnataka ha ka phainal lashai ka sngi,” la ong u Bah Khlaiñ Pyrkhat.
