Hynnin ka sngi hadien ba la dep ñiew ïa ki vote bad hadien ba ka la don ka jingshah rem, la jia ki jingkulmar ha ki katto katne ki jaka namar kito ki nongkyrshan jong u ne ka kyrtong uba shah rem kim lah ngeit ba kin shah rem wat hadien ba ki la thikna bha ban jop. Hynrei yn leh kumno haba ym pat poi sha ka thong hap ban pdiang ïa ka jingshah rem bad ka jingshah jop.
Kynmaw ha kane ka ri synshar paidbah la kdew shai ba ka jingsynshar ka dei jong ki paidbah, ïa ki paidbah da ki paidbah bad ka election ka dei ka por ba ki paidbah kin don ka bor ban pyntreikam ïa kane namar dei ki paidbah ki ban ai jop bad ai rem ïa u kyrtong. Dei ki paidbah ki ban jied ïa ki nongthaw aiñ kiba kumno kin phah sha ka ïing dorbar thawaiñ. Dei ki paidbah ki ban shim ïa ka rai kaba khatduh hadien ba ki kyrtong ki la dep ïa ka kamram jong ki ban wan pynsngewthuh halor ki nongrim ba ki ïeng ban ïakhun ïa ka election.
Ka dei ha ka sngi thep vote bad ka sekhon kaba nion ïa u budam jong ka EVM kaba rai ïa ka lawei jongka jylla ha kine ki san snem ban wan. Lada bakla ha ito i sekhon te la hap ban shu babe sansnem lynter hynrei lada dei ba nion da ka jingrai kut bad jied ïa kiba dei ban jied ruh ka la pynhun mynsiem san snem lynter.
Hooid ym lah ban len ki kyrtong ki don la ki jong ki jong ki nongkyrshan bad haba ïa kyrshan khmih lynti hi ïa kata ka jingjop ym ju khmih lynti ïa ka jingrem. Hynrei ki paidbah kum kiba la nang la shai kim dei ban shu ïaleh bieij tang namar ba shah rem thaw sa ki jingkulmar, leit kawang maw ïa ki ïing ki briew, leit ïashoh ïadat, leit thang ïing thang kali bad pynjulor ïa ki ophis sorkar. Hato kane kan ai jingmyntoi ne kan pynjop ïa uto u ne ka kyrtong ba ki kyrshan.
Eam kam ai jingmyntoi khyndiat ruh, kaba sah ka long tang ki jingbabe hadien ba la dep pynjulor lehse ïa ki ïing ki sem ki briew, ki ophis sorkar, ki kali sorkar bad paidbah bad ter ter. Kynmaw haba la dep jied haba u kyrtong um poi sha ka thong hap ban shu hun noh namar ha kane ka juk ba mynta ban ïaleh thok ruh ym lah shuh namar ka rukom shon ruh ka long beit da ki mashin bad ha ka jaka ñiew vote ruh la don lang ki CCTV. Kumta ki paidbah kim dei ban shah ïalam bakla haki katto katne ki riew shim kabu khwan myntoi shimet kiba ïalam bakla ban ai da ki khana thok khana lamler. Bunsien kine ki jingkulmar ki dei na ka daw ba don ki nong pynsaphriang ïa ki khubor thok ba sa khih win ki paidbah. Ha kum kato ka por ba dang jur ka jingsngewsih ba shah rem te da don lei lei kiba pynsaphriang ïa ki khubor thok tang katta la sngewdei bad la ïakhih win ban ïa tur puk sha kano kano ka jaka khlem da pyrkhat ei ei ruh.
Hynrei kymaw tang kawei kum ki briew kiba la nang la shai, da bishar bniah bha ïa ki khubor hamsaia bad kiba ïalam bakla ym dei ban shu ïa leh bieij bad leh shongshit namar kumba la long shakhmat ba kaba kut kan long beit tang ka jingbabe. Balei ban ïaleh khluit ka por ka dang don lada phi ïohi ba uta uba shah jied um ai ka jingshakri hok, jied noh da uwei ne pynjop don burom ïa u kyrtong uba phi kyrshan mynta bad lehse u bym pat poi sha ka thong namar ki jingpynkulmar kin ym poi shano shano ruh bad kin ym wanrah kino kino ki jingmyntoi ruh.
