Nongstoiñ, Lber, 3: Kiba bun ki shnong nongkyn-dong ha West Khasi Hills haduh kine ki sngi, ki dang pyndonkam ban kit jingkit da ki kulai na ki steshon kali ban pynpoi shaduh sha ki shnong ki thaw jong ki. Ka daw ka dei namar ka jingbym pat don ïa ki surok kali kiba bïang kiba lah ban poi sha ki shnong ki jong ki.
Ha kine ki khyndïat sngi ha ka jingleit jurip jong u nongthoh khubor jong ka Shlem ïa ki shnong ha ka thaiñ Ri Lyngngam, la lap ba ki dang don bun tylli ki shnong ha katei ka than ki bym pat don surok bad ïa ki marbam mar dih kum u khaw, shini, mluh bad kiwei kiwei la pynpoi sha ki shnong da kaba kit da ki kulai. Nalorkata la lap ruh ba ki don ki shnong kiba la don ki surok, hynrei tang shu wan u slap ki kali kim lah shuh ban ïaid, namar ka jingsniew ba palat lïam.
Haba ïakren bad ki katto katne ki paid nongshong shnong, ki la ïathuh ba teng teng ki don ki kali kiba shu ïaid jubor, hynrei ki hap ban khreh lypa la ki nar lyngka, mohkhiew ban khyllie maw bad tih khyndew, na ka bynta ban pyndap ïa ki thliew ki syar tang ban pynpoi sha ki jaka ba ki mut ban leit buh bad pynpoi ïa ki mar bam mar dih bad kiwei kiwei.
Kiba bun ki paidbah nongshong shnong ki la ong ba na ka lïang jong ki, ki la leit ud leit nam man ka por sha ki Nongmihkhmat, ba kin kyntu ïa ka sorkar ba kan ïarap lem ban pynbha ïa ki surok, khnang ba ki paidbah kin ym jynjar sah, hynrei ka jubab jong ka sorkar ka long ba kam don pisa.
Ki paidbah nongkyn-dong ki la pynpaw ba imat kata ka sorkar ka kham duk ban ïa ki paidbah nongkyn-dong ka thaiñ Ri Lyngngam. Hynrei ki la dawa ruh ba ka sorkar ka dei ban pynshai balei ba kam don pisa. Lada dei ba ka sorkar na Delhi kam ai pisa shuh ruh, ka dei ban pynshai lada dei ba ka ai khyndïat eh ruh ka sorkar ka dei ban pan na ka bynta ban pynbïang ïa ki jingdon-kam jong ki paidbah.
