Shillong, Nailar 11: Ki bor pynïaid jong ka lympung lehkai SSA Under-14 Boys League 2023 kaba la jam mynta sha ka semi final, mynta ka sngi kan sa ïoh ban pyntyllun biang ïa ki jingïakhun jong ki saw kynhun kiba ïaknieh rung final.
Kine ki saw kynhun ki ban ïakhun mynta ka sngi ki kynthup ïa ka Mawreng SC, ka Umphyrnai, ka PFR Football Accademy bad ka Mawlai.
Kumban shu pynkynmaw, ki khynnah lehkai jong ka Mawreng SC ka la ïoh ban bteng ïa ka lynti ïaid sha ka semi final dei hadien ba ka la pynliem ïa ka Nangkiew Irat SC da 4 kol, katba Umphyrnai SC ka la pynliem kput haduh 8 kol ïa ka Rangdajied United.
Ka PFR FA ka la jop kput haduh 12 – 0 kol ïa ka Sohryngkham SC bad kane ka kynhun kan sa aireng pyrshah ïa ka Mawlai SC kaba la pynliem da 3 kol ïa ka Mawkriah West SC ha ka quarter final.
Ha kane ka sngi, ïa ka jingïakhun kaba nyngkong yn sdang shuwa hapdeng ka Mawreng SC pyrshah ïa ka Umphyrnai SC ha ka por kaba 2 baje nohphaisngi ha SSA Ground. Polo. Nangta bud sa ka jingïakhun semi final kaba ar hapdeng ka PFR Football Accademy ka ban aireng pyrshah ïa ka Mawlai SC ha ka por 3:45 jan miet ha kajuh ka madan.
Ki ar kynhun kiba khur namjop mynta ka sngi kin sa ïatyngkhuh biang ha ka 19 tarik mynta u Nailar, 2023 ban ïaknieh ïa ka burom namlahduh jong kane ka lympung SSA Under-14 Boys League 2023,bad ka jingïalehkai la pynkhreh ban pyndep ha kajuh ka madan.
