Shillong, Nailar 11: Ka jingïalehkai hapdeng ki ar kynhun na ka thup jong ka Group-C ha ka lympung lehkai jong ka SSA U-20 4th Division Football League 2023 kaba la long hynne ka Sngi Thohdieng, ha MFA Turf, Polo ka la jam sha kaba kut ha kaba baroh ar kynhun ki la ïasam mar shi point.
Kane ka jingïalehkai kaba la sdang ha ka por 3 baje nohphaisngi, hapdeng ka Raitsamthiah SC pyrshah ïa ka Umsohsun SC, ka la kut ha kaba baroh ar kynhun kim shym la lah ban pynkhihjar haduh kaba kut jong ka por.
Baroh ar kynhun ki la ïakhun katba lah ban ïoh pynkhihjar hynrei ym shym la don satia ba lah ban pyndkut ïa ka jingïakhaid bad kane ka la neh haduh kaba kut jong ka 90 minit, kaba la pynlong ïa kine ki ar kynhun ban hap ïasam mar shi point na kane ka jingïalehkai.
Mynta ka sngi, ka 12 tarik kan don kawei ka jingïalehkai na ka thup jong ka Group-C, ha kaba ka Lamlynti (Madanlyngkhi) SC kan aireng pyrshah ïa ka Lummawbah SC, ka ban sdang ha ka por 3 baje nohphaisngi, ha MFA Turf, Polo.
