Shillong, Nailar 10 : Ka North Eastern Electric Power Corporation Limited (NEEPCO) ka la kynran dien ban tei ïa ka projek pynmih bording 500 MW lyngba u dewiong ha ka jylla lane ka Thermal Power Project.
“ Ka NEEPCO ka la ai jingthoh sha ngi bad pynpaw ba kam kwah shuh ban dang bteng ban tei ïa ka Thermal Power Project bad ki kwah ban pyndam noh ïa ka soskular ba la dep asoi ruh” ïathuh u Myntri ka tnad pynmih bording u AT Mondal ha ki lad pathai khubor.
U la ïathuh ïa kane ka kam la ïakren bad u CMD ka NEEPCO uba long ruh u CMD ka NTPC ha nongbah Delhi. “ Kumta kaei kaba mih na ka jingïakren ha katei ka jingïalang ka long ba ka NEEPCO kan ym pyntrei shuh ïa ka power projek hapoh ka jylla namar nangne shakhmat kan ym phai shuh sha ki thermal power project hynrei kan pyntrei beit da ki power project ki ban pynjyrngam ïa ka mariang. Kumta ka lah ban dei na kane ka daw ba ki la pyntip ba kim kwah shuh ban dang bteng ïa ka thermal power project kaba la dep ïasoi soskular bad ka sorar jylla” ïathuh u Mondal.
Shuh shuh haba kylli u Mondal u la ong ba ka daw bah bad ka thermal power project ka dei ba ka don ka jingïasoh bad u dewiong. Namar katba phim pat lah ban pynthikna ïa ka jingïoh dewiong kan long lehnohei ban shu bei ne seng ïa ka projek kaba heh namar kan sa shu sah khongreng khlem pyntreikam hadien habud kumta kam long kaba suk lada ym pat pynthikna bha ïa u dewiong” ong biang u myntri. Nalor kata kiwei ki jingmyntoi na ka bording ba pynmih na ka um ka dei ba 3 % ka bor ding bad 1 % la ïoh ban leh ïa ki kam pynroi na ka bynta ki trai shnong katba na ka thermal power projek ym don kaba kum kane ka skhim.
Hooid ki la don kiba wan tyrwa ban tei ïa ki power projek ha ka jylla hynrei ka sorkar kan dang bishar bniah hynrei ka jingkylli ka long lada ki kompani jong ki riew shimet ki wan tei ïa ki power projek la ka dei ka thermal, hydel ne solar bad kiwei kiwei ki kwah ba ka sorkar kan thied lut ïa ka bor ding ba ki pynmih bad kane kan buh ka jingeh kaba khraw eh.
U la ïathuh ba la ïakren ruh bad ka NTPC ban pynmih bording na ki niut ki nier hynrei ka jubab kaba ïoh ka long ba kine ki niut ki nier ne ki jaboh kiba don ha ka jylla kim pat lah ban pyndap ban pynmih bor ding. U la ïathuh ba ka sorkar mynta ka dang pynkhreh ïa ka plan kumno ban weng noh ïa kane ka jingkyrduh bording ha ka jylla.
“ Ngi da shim khia shisha ban thaw ki lad ki lynti ban ïohi kumno ban lait na kane ka jingkyrduh bording ha ka jylla bad kane ka dei na ka bynta shirta ym dei tang shibit por.Ngi pyrshang ruh ban peit kumno ban pynduna ïa ka jingduh nong bad kumno ruh ban pynbiang bording sha ka Grid”. U la ïathuh ruh ba ïa ka CM’s Solar Mission yn sa plie paidbah naduh lashai ka Sngi Thohdieng.
