Nongpoh, Nailar 14: Mynta ka Lah Sngi U Blei, uwei u khynnah skul ula lait na ka jingiap hadien ba ula shah bat ha ka bording ilektrik katba u dang pynkhuid ïa kawei ka jaka hapoh ka skul Morning Star Higher Secondary School, Mawroh kaba don hajan Nongpoh, Ri Bhoi District.
Une u khynnah skul uba la mynsaw na ka jingshah lympat ha ka bording ilektrik, la tip kyrteng kum u Rahborlang Narlong 18 snem ka rta ba shong basah ha ka shnong Umklai Marngar bad une u khynnah u dang pule ha ka klas X ha katei ka skul.
Katkum ka jingtip ba la ïoh lum, la ïathuh, ba une u khynnah skul lem bad ki paralok jong u katba ki dang pynkhuid ïa kawei ka jaka hapoh ka skul, ha ka por 12 baje eiei nohphai sngi, une u khynnah ula kum bat ïa uwei u pipe uba la kum tyngkhuh bad u sainar ilektrik jong ka MePDCL bad ula shah lympat ha ka bording ilektrik haduh ba ula mynsaw jur na ki bynta ki kjat bad ki kti.
Shuh shuh, la iathuh, ba ki bor pyniaid skul ki la rah mardor ïa une u khynnah skul uba la mynsaw jur sha Bethany Outreach Hospital ban ïoh ïa ka jingsumar kaba mardor.
La iathuh ruh ba une u khynnah skul namar ba ula mynsaw jur kumta la pynkit noh ïa u sha Nazareth Hospital Shillong ban ïoh ïa ka jingsumar kaba janai.
