Nongpoh, Rymphang, 20: Ka jingkharoi jong ki Youtube Channel bym ithuh ithaw haki rynsan Social Media kiba leh mynleh kum ki nongpathai khubor kala long pynban ka jaka pynthohbria bad ïalam bakla ïa kiba bun ki paidbah ha kane ka juk ba mynta lyngba ki khubor thok bad kiba lamler bad kawei ka Youtube Channel bala ai kyrteng 7trep TV dang ha kine ki khyndiat sngi kala pynmih kawei ka khubor kynthoh pyrshah ïa u Pynïaid Sing Syiem da uwei u rangbah ba khlem da pynpaw kyrteng, da kaba pynmih ruh da ka dur jong u Bah BB Makdoh nongïalam ka Synjuk ki Rangbah Shnong ha Ri-Bhoi District kaba dei ka khubor kaba thok bad bym don nongrim.
Na ka liang ki Rangbah Shnong jong ki shnong bapher bapher ka Ri-Bhoi District mynta ka sngi kila pynlong da ka jingïakynduh ba kyrkieh hadien ka jingmih jong katei ka khubor haka rynsan Youtube kaba la ktah ïaka burom bad ka longrynieng jong u bah BB Makdoh Chairman ka Synjuk ki Rangbah Shnong Ri-Bhoi namar um shym la kren ne kynthoh eiei pyrshah ïa u Bah Pyniaid Sing Syiem CEM ka KHADC ha kaba ïadei bad ka elekshon ha Mawryng-kneng Consti-tuency.
Haba kren sha ki lad pathai khubor naka liang u Bah BB Makdoh Chairman ka Synjuk ki Rangbah Shnong u la pynshai ba katei ka khubor ka dei kaba shu thok bad lamler ha kaba katei ka Youtube Channel bala ai kyrteng 7trep TV kala pynmih ïaka khubor kaba la thoh caption “Khyrwit tangeh u wei u rangbah ia u Bah Pyniaid N Syiem ba kren kulmar ïaka VPP, ngap phin sa sam…” da kaba kynthoh ruh ba ka jingjop u prah ha Mawryngkneng Constituency ka dei ka jingïarap ka TMC, watla katei ka channel ka khlem pynpaw kyrteng hynrei kala thep pat da ka dur jong u.
U Bah BB Makdoh u la kren shai ba katei ka khubor bala pynmih da katei ka channel kam dei satia kaba kren ma u bad la tip shai ba kadei ka khubor kaba lamler bad kaba thok kaba la ktah ïaka dur ka dar ka jong u.
Kum u Chairman ka Synjuk ki Rangbah Shnong u la pynshai ruh ba ngim ju donpor ban kren pyrshah ïa kiwei bad kaei kaba ki trei ka dei beit thik naka bynta ka jingmyntoi jong ki shnong bad ka dong Ri-Bhoi bad ka jingkynduh ïaki myntri sorkar ka dei beit naka bynta ka jingeh jong ki paidbah ka dong Ri-Bhoi, dei namar kata ka daw ba ki nongpynthoh bria k ki shim kabu da kaba shim da ka dur jong u, bad u la pynshai ruh ba katei ka dur bala thep ha katei ka channel ka dei kaba u kren halor ka ishu casino ha Ri-Bhoi naduh 2 snem mynshuwa.
Une u rangbah bad ka kynhun ki Rangbah Shnong na Ri-Bhoi mynta ka sngi kila leit ban ujor syndon da ka ejehar halor katei ka jingshah pynthohbria ha Nongpoh Police Station bad kumjuh ruh kila leit ban ïakynduh ïa u SP ka Ri-Bhoi ba un shmkhia ïa katei ka kam namar kum ka synjuk ki Rangbah Shnong kam kwah ba kum kitei ki channel kiba ïalam bakla ïaki paidbah kin kharoi na ka por shaka por.
