Khang lut ka Sorkar ïa ki par maw bad shyiap, kumno khmih lynti ban pyndep kloi ïa ki skhim Sorkar?

Nongpoh, Rymphang 20: Ka Synjuk ki Rangbah Shnong Ri-Bhoi District mynta ka sngi kala mih shakhmat ban pynpaw ïaka jingeh ban pyntrei ïaka skhim MNREGA haki shnong bapher bapher ha Ri-Bhoi District namar ba kim ioh satia ïaki maw ki shyiap namar ba ka sorkar kala khang lut ïaki par maw bad ki jaka tih shyiap.
Haba kren sha ki lad pathai khubor naka liang u Bah BB Makdoh Chairman ka Synjuk ki Rangbah Shnong Ri-Bhoi District u la ong ba kum ki Rangbah Shnong ba peit ïaki kam shnong kam thaw ki shem jingeh shisha ban pyntrei ïaka skhim bylla 100 sngi ne ka MNREGA namar ba kim ioh satia ïaki maw ki shyiap naduh bala khang ka sorkar namar baroh ki jingtrei u maw bad u shyiap ki dei kiba donkam hakhmat eh.
U la ong ruh ba ka sorkar ka ai ïaki work order ban pyntrei ïaki jingtrei katkum ka por bala buh, hynrei ka jingeh jong ki paidbah pat ka sorkar kam tip da kaba pynpaw ruh ba mynta u maw u shyiap ba ju ioh ban thied naki jaka ba jan kim ioh shuh namar bala khang lut ïaki par maw bad ki jaka tih shyiap, te ka long shisha ka jingeh kaba khraw khamtam ki shnong kiba jngai ban leit thied maw bad shyiap shaduh ki thaiñ Killing kam dei kaba suk namar ka mang tyngka ruh ka dei kaba rit.
U la ong ruh ba kum ka synjuk kala buh ruh da ka jingthoh sha u Myntri ba dei peit u AT Mondal ba kum ka sorkar ka dei ban pyrkhat sani bha halor ka jingkhang dam syndon ïaki par maw bad ki jaka tih shyiap bala pynduh kam ruh ïakiba bun ki samla hakane ka jylla, u la bynrap.