Buh thong ka Sorkar ban pyndep ïa ka Mawphlang Science & Commerce College ha u Jylliew

Shillong, Rymphang 20 : U Myntri ka Tnad Pule ka Jylla Rakkam A Sangma ha ka sngi Ba-ar, ula pyntip hapoh ka ïing Dorbar ba ka jingtei jong ka Science & Commerce College ha Mawphlang la buh thong ba yn sa pyndep noh ha u bnai Jylliew mynta u snem.
Haba jubab hapoh ïing Dorbar, u Rakkam ula ong “Ka jingshim klas kan sdang hadien ba la pyndep ïa ka jingtei bad ka jingthung ïa ki nonghikai bad ki nongtrei”.
U pyntip ba ka jingtei mynta kala ïaid kumba 72 percent. ïa kane ka project la mang pisa T.36.55 klur ha ka 30 tarik u Jylliew 2017 bad haduh mynta la pynlut kumba T.14.815 klur sha ka project.
U MLA ka Mawphlang u bah Matthew B Kurbah ula buh jingkylli la ka long kaba lah ban pyndep ïa ka project ha u Jylliew naba ym shym la paw ba ïaid ka kam ha kane ka jaka. Ula kyntu ïa ka Sorkar ba kan pynkloi ïa ka jingpyllait ïa ka pisa ban lah pyndep noh mar mar ïa ka project.
Halor kane, u Rakkam ula ong ba shuwa kane, ïa kane ka project la buh ban pyndep hapoh u snem 2020 hynrei la pynslem noh ïa ka namar ka jingslem ban aiti ïa ka jaka bad ka jingpyllait ïa ka 2nd installment bad kumjuh ruh ka jingwan ka khlam Covid-19.
Hynrei ula pyntip ba dang hynnin ka sngi, la pyllait ïa ka 2nd installment sha ka agency ba pyntrei ïa kane ka project ba kan lah pyndep noh. “Namar kata, ngi la khmih lynti ban pyndep ïa ki kam hapoh ka por bala buh”.