Shillong, Rymphang 20 : U Myntri ka Tnad Public Health Engineering (PHE) u Marcuise N Marak mynta ka sngi Ba-ar ula ong ba ka jingpyntreikam ïa ka Jal Jeevan Mission (JJM) ha Meghalaya ka long kaba biang bha, da ka jingnang kiew ha ka jingdon ki longïing ba la ïoh kor um ha ki jaka Nongkyndong kaba long naka 4550 (0.7%) sha ka 4,85,927 (74.60%).
Hynrei, ban kynjoh ïa kane ka thong kam shym la long kaba suk khlem ki jingtynjuh kiba bun khamtam eh ha ka liang ka jinglum jingkheiñ bad ai jingtip, ong u Marak haba jubab ïa ka short duration discussion ba la wanrah da u MLA ka VPP na North Shillong Bah Adelbert Nongrum ha ïing Dorbar Thaw Aiñ.
Ula ong ba ka kam ban lum jingtip bad pynrung kyrteng ïa ki jingtip ba bniah jong palat shi million ki longïing ha baroh ka Jylla bala ïoh ïa ka JJM,ka dei ka kam kaba bam por bad ka bym lah ban leh ïa ka jingbunkam ki nongtrei nalor ka jingdon kam ban pynshisha da kaba pyndonkam ïa ki Aadhar Card lane Voter ID kaba la nang pynjyrwit jyrwat.
Nalor kane, ka jingkyntait jong ki briew ban ai ïa ki jingtip ba shimet kala nang pynsyllang shuh shuh ïa ka kam, ha kaba don ki khep la hap pan ïa ki jingïarap na ki dkhot jong ka Village Water & Sanitation Committee (VWSC).
