Shillong, Rymphang, 20: U Myntri Rangbah ka Jylla ha ka sngi Baar u la kular ba ka Sorkar kan sa shong bishar halor ka jingtyrwa ban wanrah ïa ka Minimum Support Price (MSP) ne ka dor kyrshan na ka bynta u kwai.
U Sangma u la ong ba ka dor jong u kwai la die ha ka dor ba palat shiphew shah bad bynrap, “namarkata, ka dor bynrap ka long tang ka lad ban pyntyllun shakhmat.”
U Sangma u la ai ïa kane ka jubab halor ka jingkylli jong u MLA ka UDP na Amlarem Constituency u Bah Lahkmen Rymbui, uba la kyrpad ïa ka Sorkar Jylla ban thaw lad da kaba wanrah ïa ka Minimum Support Price na ka bynta u kwai.
U Bah Rymbui u la ong ba ka dor jong u kwai ka la hiar bha haduh katta katta bad kane ka pynlong ïa ki nongrep ban pynmih bun bha ïa u kwai katba ka dor pat ka la nang hiar arsut.
Kane ka jingkylli jong u Bah Rymbui ka long da kaba kdew ïa ka jingpynbna ba la pynmih da ka Sorkar India ha u snemn 2020 kaba buh ïa ka dor kyrshan (Minimum Support Price) na ka bynta u kwai ha ka dor T. 200.
Haba pynpaw ïa ka jingsngewhun halor ka jubab jong u Myntri Rangbah, u Bah Rymbui u la kyrpad ba ka Sorkar ba kan buh ruh ïa ka Processing Unit ha ka shnong Amlarem ban kyntiew ïa ka jingpynmih ïa u kwai bad ban pynïaid iew ïa une u mar rep.
U Sangma u la pyntip ba ki don ar tylli na ki 46 tylli ki Processing Unit ba la buh ha Amlarem. U la ïathuh ruh ba jin haduh T. 41 lak la pynlut nalor ka T. 1 klur kaba ladep pynlut.”
Shwa kane, ka Myntri kaba khmih ïa ka tnat Rep ka Dr. Ampareen Lyngdoh ka la ïathuh ba ki don 46 tylli ki Processing Unit kiba don ruh ïa ka sem treikam, ki mashin khoh snep kwai, ki sem pynrkhiang kwai (solar tunnel dryer), bad ki Soaked Pit ba la buh ha ki 21 tylli ki Block jong ki 10 tylli ki District. Ka dor ba la thied ïa kine ki tiar ka long T. 14.06 klur.
34 Unit ki dei kiba la shna pyndep bad sa 12 Unit kiba dang sah yn sa pyndep ha ki bnai ban sa wan.
Ka Dr. Ampareen ka la ong ba u kwai u dei uwei na ki mar rep ba ka tnat Rep ka la phaikhmat bha ha ki snem ban sa wan haba jubab ïa ka jingkylli ba la buh da u MLA ka UDP na Mawkyrwat Constituency u Bah Renikton Lyngdoh Tongkhar, uba kwah ban tip hato ïa u kwai la ñiew neem kum u mar shalan.
