Shillong, Rymphang 20 : U Symbud Myntri Rangbah ba khmih ia ka Tnad Transport Bah Sniawbhalang Dhar, u la ïathuh ha ïingdorbar ba na ka liang ka DC ka East Khasi Hills u la phah ïa u CE ka tnad PWD (R) ban jurip ïa ka jingkieng ha Umrynjah la ka ka biang ne em ban ïaid ki trok ba kit palat 9 ton. Hadien kane na ka liang ki bor District kin sa pynmih da ka hukum kaba biang.
Kane ka jingïathuh u Myntri ka long halor ka Call Attention Motion ba la wanrah da u MLA ka Mawlai, u Bah Brigthstarwell Marbañiang, halor ka jingmih khubor hau Mawphor ïa ka jingujor ka Synjuk ki san Shnong.
Kane kala mih hadien ba ka Synjuk ki San Dorbar Shnong ka Mawlai, kila leit ujor sha ka Deputy Commissioner myn ha ka 12 tarik Rymphang, ba pyntip ia ka jingwan iaid ki trok ba kit palat pud na jingkieng Umrynjah ha ka por mynmiet. Ka Synjuk ka pynpaw ba ka jingiaid jong kine ki trok ka lah ban pynsniew ia ka jingkieng kaba dei tang ma ka, ka lad pyniasoh sha ki shnong ki thaw.
Haba wanrah ïa kane ka Motion, u MLA Mawlai u la kdew ruh ïa ka jingma kaba ap na ka jingïaid kine ki trok na jingkieng Umrynjah ter ter sha Umden shaduh Mawsiatkhnam shaduh ki shnong kiba hap sha Mawlai da kaba ong ba ka jingmoramot ïa ka jingkieng ha Umiam, ka la pynlong ïa ki kali wat ïa kiba kit palat pud ban pyndonkam ïa kane ka jingkieng kaba la rim bad sator. “Kane ka surok kaba nga ong kadei kam dei kaba la shna na ka bynta ban ïaid ki trok ne ki kali kiba kit palat pud”, la ong u Bah Marbañiang, da kaba bynrap ruh ba ki don ki bynta kiba long thiep bha bad ki trok kiba kit palat pud kin shem jingeh ban ïaid bad ka buh jingma ruh ïa ki paidbah.
