Shillong, Rymphang 20: Ka Myntri ka tnad Agriculture & Farmers’ Welfare ka Dr Ampareen Lyngdoh mynta ka sngi Baar, ka la ïathuh ba ka Geographical Indication (GI) Tag kaba la ai ïa u Shynrai Lakadong ka ïeng ban ïada ïa ka hok long trai bad tynrai jong ka rukom pynmih bad ka jingnang jingtip ban pynthikna ba tang ki nongrep bad ki nongthung katei ka thaiñ ne Geographical Area, kiba lah pyndonkam ïa ka GI tag.
“Ka dei ka Tag ne ka shap kum ka jingpynithuh ïa ka hok long trai bad ban lah pynïaid ïew bha ïa ki mar bad ki nongdie ba kin lah ban pynïapher ïa u mar ha ki ïew ki hat” ong ka Dr Ampareen Lyngdoh haba jubab ïa ka zero hour notice kaba la wanrah da u MLA ka VPP na Nongkrem u Bah Ardent M Basaiawmoit hapoh ka ïing dorbar.
Hadien ba la pynlong bunsien ïa ka jingsngap ïa ki jingpynsngew bad ki jingpynshai, ka Registrar jong ka GI ha Chennai kala pynmih ïa ka jingpynbna ba la ai ïa u GI Tag nombar 741 ïa u shynrai Lakadong na East Jaintia Hills bad West Jaintia Hills District ha ka 29 tarik u Naiwieng 2023.
ïa katei ka aplikeshon la phah da ka Lakadong Turmeric Cooperative Union Limited, Jowai lyngba ka jingkyrshan lang jongka Directorate of Horticulture, Department of Agriculture & Farmers Welfare.
Ka Dr Ampareen kala pyntip ba bun jait ki nongthied ki la don bynta ha kaba thied ïa u symbai Lakadong na ka bynta ban thung bad ban pynmih ha ki jylla jongki bad kumjuh ban die ïa u kum u ‘Lakadong Turmeric’ bad kane kala pynklumar khlieh ïa ki nongthied bad pynthohbria ïa ka dur ka jingbha bad ïa ka jinglong kyrpang jongu shynrai Lakadong. Kumta kane ka lah ban pynduh noh ïa une u mar bad ka jingduhnong kaba khraw ha ka ïoh ka kot jong ki nongrep Lakadong hapoh ka jylla.
“Da kaba shim khia ïa kane ka mat, la pynmih ïa ka notification da ka tnad bad la mana jur ban die ïa u symbai Lakadong na ka bynta ban pynmih ïa u shabar jongka rilum Jaintia,” kala ong bad ka bynrap ba kine ki jingtuklar ki la ïarap shibun ban kyntiew ïa ka jingrep ïa u Lakadong da 13 shah ïa ka jingdon ki nongrep ha ka kam rep Lakadong.
Kane ka jingshim khia ka long kaba ïaid ryngkat lang bad ka jingangnud jong ki nongrep ban kyntiew arshah ïa ka jingïoh ka jongki bad ban plie lad ïa ki nongrep ban buh dor hi ïa u shynrai Lakadong.
“Kumta ka long kaba donkam ban ïada ïa ka jinglong trai ïa u Lakadong bad ban ai jingmyntoi ïa ki nongrep ïa kaba ka sorkar kala shim ïa ki sienjam kat kiba lah” kala ong.
Nalor kane, ka Dr Ampareen ka la ong ba ka sorkar Meghalaya ka ïengskhem ha ka ban kyntiew bad ban pynïaid ïew ïa une u jingthung uba mih napoh ka jylla bad kan ïaid shakhmat ruh ha ka ban pynïoh ïa ka GI Tag na ka bynta kiwei kiwei ki mar ruh.
“Kane kan plie lad ïa ka jylla ban pynmih ïa kiei kiei kiba long tynrai ban tyrwa ha ki rynsan kiba don ha kylleng ka pyrthei ka ban ïarap ban kyntiew ïa ka ïoh ka kot jong ki nongrep bad ban kyntiew ïa ka ïoh ka kot ha ka ïmlang sahlang” kala ong.
