Shillong, Rymphang 20 : Ka Sorkar Jylla ka la mang pisa haduh 338 klur tyngka ban pyntrei ïa ka Tura Smart Town bad ka la mang ruh ïa ka pisa ba tang 79 klur tyngka na ka bynta ka sor Jowai.
Haba jubab ïa ka jingkylli jong u MLA ka Nongstoin Bah Gabriel Wahlang, u Myntri Rangbah Conrad K Sangma ula ong ba ki artylli ki Smart Town ka Jylla ki dei ka Tura bad ka Jowai.
U Myntri Rangbah ula pyntip ba ka pisa baroh ba la mang ïa ka sor Tura ka long 338 klur tyngka katba ïa ka Jowai la mang tang 79.8 klur tyngka.
Haba wanrah ïa ka jingkylli bynrap. U Bah Gabriel ula kyntu ïa u Myntri Rangbah ban kynthup lang ïa ka Nongstoin hapoh ka Smart Town Project.
U Conrad ula pyntip ba ka Sorkar ka angnud ban kynthup ïa baroh ki nongbah jong ki District hapoh ka Smart Town Project bad ïa kane yn sa leh da ki pali pali watla kam pat don satia ka plan ïa kane.
