Shillong, Rymphang 20 : Ka Sorkar Jylla kala rai ban pyllait ia ki artylli ki Autonomous District Council(ADC) kata ka Garo Hills Autonomous District Council (GHADC) bad ka Jaintia Hills Autonomous District Council (JHADC) ban lait na ka jingtyrkhong pisa, kaba la poi shaduh u pud ba kim lah shuh ban siew ïa ka tulop jong ki nongtrei la bun bun bnai mynta.
Haba ïakren bad ki nongthoh khubor mynta ka sngi Ba-ar, u Symbud Myntri Rangbah ka Jylla ba khmih ia ka Tnad District Council Affairs (DCA) u Bah Prestone Tynsong ula ong ba ka Sorkar ka kloi ban kyrshan ïa ka GHADC bad JHADC ban lait noh na ka jingtyrkhong pisa bad ban lah siew ïa ka tulop ki nongtrei jongki.
Kine ki artylli ki District Council kim shym la lah ban siew tulop ïa ki nongtrei. Ka GHADC marwei ka khlem lah ban siew tulop ïa ki nongtrei mynta la lai snem.
“Ngi la pyrshang ban leh eiei na ka liang ka Sorkar. Nga la dep ïakren bad u Myntri Rangbah bad u Myntri Rangbah un sa kren (halor kane ka rai) ha kane ka Dorbar Mang Tyngka ba mynta” ong u Bah Prestone.
La ki artylli ki ADC ki ïoh ïa ki bhah khajna na ki marpoh khyndew, u Symbud Myntri Rangbah ula ong “Kine ki dei ki kam kiba dang pynïaid bad kam dei eh ba ha man ba kut u snem mang tyngka, phi hap ban siew pynkhuid ïa ki. Ka shong ha ka jingïoh lum bad hadien ka jingkhate bad ka jingpynbiang hangne hangtai, yn sa pyllait ïa ka pisa sha ki District Council”.
