Snohkti lang ki Liang Pyrshah bad Liang Synshar ban kyntu pyllait ïa ka Sorkar

Shillong, Rymphang 20: Ki dkhot ka Liang Pyrshah bad ka Liang Synshar mynta ka sngi, ki la ïasnohkti lang lang ban kyntu ïa ka sorkar ban pyllait ïa ki paidbah kiba im ja na kaba tih shyiap bad tih maw na ka jingkhang ka tnad Forest jong ka sorkar jylla.
Kane ka jingïasnohkti lang ka long halor ka Motion ba la wanrah da u Bah Ardent Basaïawmoit, MLA Nongkrem uba la wanrah ïa ka mat jingïakren ban kyntu ïa ka sorkar ban thaw ki lad ki lynti, khnang ba ka tnad ba ki paidbah kiba la trei ïa kane ka kam lah da ki phew snem kin nym shah pyndik ha ka tnad Forest kaba ju ai Notice na ka por sha ka por ba kidei ban khang noh ïa ki jaka tih shyiap bad tih maw jong ki.
“Ka long kaba isynei ïa ki paidbah bapli, namar ka kam tih shyiap tih maw kadei kaba ki la ju trei da ki phew snem, hynrei ka tnad Forest ka pyntreikam ïa ka aiñ jong u snem 2016 ban khang wat lada kine kiba tih shyiap ne tih maw kidei kiba tih ha ki jaka iba rit bad kim dei ki jaka ruh ba rep ba riang ne ki jaka ba mih ki dieng ki siej”, la ongu Bah Ardent.
U nongïalam ka VPP, u la sot ruh na ki rai jong ki ïingbishar ha ki snem kiba ladep, ha kaba u la ong ba ka sorkar ka lah ban pyndonkam da kine ki rai ban shna ïa ki kyndon khnang ba ki paidbah kin nym shah ktah bad kin tih katkum ki kyndon. Ym dei ban shu khang beit sbak.
Shuh shuh u Bah Ardent u la ong ruh ba kine kiba tih shyiap ne tih maw ym dei ba ki pyndonkam da ki kor ki bor ban shalan shabar jylla ne shabar ri, hynrei ki tih na ka bynta ka jingdonkam hi ha ki shnong ki thaw la jong.
Ïa kane ka Motion la kyrshan ruh da u Bah Matthew Kurbah, MLA ka UDP na Mawphlang, uba la ong ba ki paidbah ha Mawphlang ruh ki mad ïa kane kajuh ka jingeh kumba la kdew da u MLA jong ka Nongkrem, ha kaba ki la duh kam duh jam bad ki don hapdeng ka jingtieng jingsmiej namar ka jingai Notice kaba man la ka por da ka tnad Forest. “Kiba bun kiba im ja na kaba tih shyiap bad tih maw ki la ud ba kim lah shuh ban phah skul ïa ki khun k kti namar ka jingshah khang ka kam bylla na ka jingtih shyiap bad tih maw”, u la ong. U la kyntu ïa ka sorkar ba kan peit lem halor kane.
U MLA ka Congress na Nongstoiñ, u Bah Gabriel Wahlang ruh u la kyrshan ïa ka Motion da kaba ong ba hadien ba ki briew ki la duh bylla na ka jingkhang pomdieng ha u snemj 1996 bad khang tih dewïong ha u snem 2014, ka kam tih maw tih shyiap kadei ka lad kamai bad trei bylla jong ki. Hynrei mynta pat sa ka tnad Forest ka khang ïa ki ïa kane ka kam. “Haba la khang lut kumne da ei ki briew kin trei kin ktah”, la ong u Bah Gabriel. U la iathuh ba ha Nongstoiñ ki don ki jaka kiba ki briew ki shu tih maw da ki tiar ba ju pyndonkam naduh mynshuwa kum ki lyngka, ki mohkhiew, hynrei ïa kine ruh la khang. “Nga kyntu ïa ka sorkar ba kan peit ba ka jingïada ïa ka mariang kam dei pat ban ktah ïa ka jaka kpoh jong ki briew”, la ong u MLA Nongstoiñ.
U Rupert Momin, MLA ka NPP na Kharkutta, haba kyrshan ïa ka Motion jong u Bah Ardent, u la ong ba ha Garo Hills kiba bun ki samla ki la pan laisen ban ïoh khat shyiap na ki wah kiba don ha Garo Hills, hynrei kim shym la ïoh satia, katba ka Assam pat ka khat suk ïa u shyiap uba tuid na Meghalaya. “Ki surok sha ki thaiñ Dudai ki sahkut kali tang na ka daw jong ki trok kit shyiap kiba wan ïaid na ki bynta ka Garo Hills. “Ka long kaba sngewsih ba ki briew na Assam ki ïoh khat suk ïa u shyiap ba na Meghalaya, katba ki briew jong ngi pat ki shu peit jaw dud”, la ong u MLA ka Kharkutta.