Shillong, Rymphang 20: Ka ïingdorbar Thawaiñ ka la kyntait ban ïatai ïa ka Amendment Bill ba la wanrah da u Bah Adelbert Nongrum, MLA ka VPP na North Shillong na ka bynta ban pynkhlaiñ ïa ka jingtreikam ka Lokayukta.
Ka ïingdorbar ka la kyntait ban ïatai lyngba ka voice vote ne da ka sur ka jingbun briew ka liang synshar ha Assembly, namar kane kadei ka Private Member’s Bill ba la wanrah da u dkhot ka Liang Pyrshah.
Ha shuwa jong kane, u Bah Adelbert haba wanrah bad batai lyngkot ïa kane ka Bill, u la ong ba ka Amendment Act ha u snem 2021, ka la ktah shibun ïa ka jingtreikam jong ka Lokayukta, kaba ha ka jingshisha ki paidbah ki peit sha kane ka bor treikam ban ïakhun pyrshah ïa ki kam bamsap ha ka jylla. Haba pan jingkyrshan halor kane ka Bill, u Bah Adelbert u la ong, “Nga kyrpad ïa ka ïingdorbar ban ïakyrshan lang, namar ba ki paidbah ki peit sha kane ka ïing ban long kum ka nonglam lynti ha ka thma pyrshah ïa ka bamsap”.
U la kdew ruh ha kane ka Amendment ban wanrah biang ïa ka aiñ ha ka rukom kumba la shna da ka Parliament na ka bynta ka Lok Pal ha sorkar pdeng bad ka Lokayukta ha ki jylla kata ha u snem 2013, ïa kaba ha Meghalaya la pyntreikam ha u snem 2014.
Hynrei u MLA ka North Shillong um shym la ïohlad ban batai khambha shuh shuh ne kiwei pat ki MLA ka VPP bad kumjuh ruh ki dkhot ka ïing kim lah ban ïashim bynta, namar ba ka ïingdorbar kam aiald ban ïatai haba kane ka Amendment Bill ka la shah rem noh ha ka Voice Vote.
