Mawkyrwat, Rymphang 20: Ka jingjia mynta ka sngi ka la jia ha shnong Kenïong ha kaba kawei ka trok ka la noh sha riat kaba kynjang kumba 120 phut ei ei bad u nongñiah ha kane ka jingjia u la mynsaw jur.
Ha ka tyllong khubor ba ki pulit la ïathuh ba katkum ka jingïoh jingtip jong ki ha ka por 9:30 mynstep ba ka la don kawei ka jingjia ha kaba kawei ka trok kaba don ïa u number ML 12 – 2702 ka la noh sha riat ha lynti sha Kenïong, South West Khasi Hills District ba la ñiah da u Splendar Snaitang, 25 snem karta na ka shnong Kenïong. Ha kane ka kali la donlang ruh u Fairlyson Thyrniang, 23 snem na ka shnong Nongnah, South West Khasi Hills District ha kaba ïa une ruh la rah sha Mawkyrwat CHC ban shah sumar na ki jingmynsaw ba malu mala katba ïa u nongñiah pat la pynkit noh sha Shillong na ka bynta ki jingsumar kiba khambha.
Halor kane ka juh ka jingjia katkum na ka jingïathuh jong ki paidbah jong ka shnong Kenïong ki lap ba ha kane ka trok la kit ïa u marbam (piat) bad kane ka kali ka dei mih na Nongstoiñ.
