MSL 5: Pynliem ka Amlarem ïa ka Mawlai ban rung pre-QF; Rem biang ka Rangdajied

Shillong, Jymmang 06: Ka Amlarem SC ka la pynliem noh ïa ka Mawlai SC, kaba bat ïa ka nam lahduh, da 2-1 kol ha ka jingïalehkai ba khatduh jong ka Group C ha ka lympung 5th Meghalaya State League ha Amlarem hynne ka sngi Balang.
Shuwa kane ka jingïakhun, ka Mawlai ka ladep ban pynthikna ïalade ïa ka jaka ha ka pre-quarterfinal hynrei na ka bynta ka Amlarem kane ka jingïalehkai ka long kaba kongsan, namar ka donkam ban jop ban jam shakhmat sha ka wat ïakhun Round-16.
Ka kynhun kaba ïalehkai hala ïing (Amlarem) ka la pynkhihjar dang kloi tang ha ka minit kaba nyngkong lyngba u Wantiwjune Buam hynrei ka Mawlai ka la pynïakhaid ha ka minit kaba 15 lyngba u Batskhemlang Thongnirit. Nangta u Wantiwjune u la pynkhihjar biang ha ka 76 minit kaba dei artad ka namtam ban ïoh ïa ka jingjop. Da kane ka jingjop ka Amlarem ka la jam sha ka kyrdan ba ar ha ka Group da kaba kamai 10 point, hadien ka Mawlai (13 point). Kane ka resol ka la pynkut noh ïa ka jingïalehkai khlem shah rem jong ka Mawlai ha ki 11 tylli ki jingïakhun ha ka MSL naduh ka jingjop jong ka ha u snem 2024-25.
Ha Mawkyrwat, ka lahduh jong u snem 2023, ka Rangdajied United FC ka la mad ïa ka jingshah rem kaba arsien lynter, ha kane ka kynti ka namrem ka la wan hakhmat ka Mawten SC da 1-0. ïa ka namtam jong kane ka jingïakhun ha ka Group H, la thep da u Lastbornson Marwein (12’).
Kane ka resol ka la iehnoh ïa lai tylli ki kynhun ban ïakhaid mar 8 point, kata ka Rangdajied, ka Mawten bad ka Seng Samla Umdang Pyllun. Ka MSL ka pyndonkam ïa ka resol jong ki jingïakhun ba ïakynduh pyrshah lane head-to-head ban pynïakhlad ïa ki kynhun kiba ïakhaid ha ki poiñ bad ka komiti ïalehkai jong ka Meghalaya Football Association kan sa pynthikna ïa ka kyrdan jong ki kynhun ha kane ka Group ha ka por kaba biang.
Hynrei ha ka Group A, kam shym la don satia kum kane ka jingeh, ha kaba ka Khimusniang SC ka la lah ban khanglad ïa ka Nongkseh SSCC ban ïakhaid da 1-1 kol ha SSA Stadium, Shillong. Kane ka resol ka la pynlong ïa ka Nongkseh ban wan ha khlieh duh ha ka Group, katba ka Khimusniang ha ka kyrdan ba-ar.
Baroh arliang ki la ïoh ïa ka jingkyrshan kaba paka na ki paidbah, hynrei dei ki nongkyrshan jong ka Nongkseh kiba la risa nyngkong hadien ba u Shano Tariang u la pynkhihjar ha ka minit kaba 56. Hynrei, ka Khimusniang, ka la jubab lyngba u Dawanbiangmi Passah (75′), uba ka rukom thep jong u ka la pynshoh biej bad khring ïa ki khmat ki nongpeit kai.
Ha Mairang, ka Langsning FC ka la pynjemkhnap da 5-0 ïa ka Mishon SSCC lyngba ki kol ba la thep da u Samuel Phawa (26′, 42′), u Kyrmenskhem Mukhim (32′) bad u Nelson Rymbai (57′, 90′) uba lamkhmat ïa ka thup kyrdan Top scorer. Ka Langsning ka la dep ban pynthikna ba kan ïoh ïa ka kyrdan ba nyngkong hynrei ka Mishon ka dang sah sa kawei ka jingïakhun ban pyndep, ban long pyrshah ïa ka Lawbah SC ha ka 08 tarik Jymmang. Kane ka jingïalehkai kan rai mano ban ïasoh bad ka Langsning ha ka wat ïakhun ban wan.
Hynne ka sngi ki la don ruh lai tylli ki jingïakhun ha kaba ka resol kam don jingktah ei ei ïa ka kyrdan jong ki kynhun.
Ha Williamnagar, ka Group G ka la sakhi ïa ka Maram FC kaba bat kyrdan ba ar, ba ka la pynliem noh ïa ka Attong Matgrik FC da 6-1 kol. U Easter Salchang Ch Sangma (36′, 37′, 61′) u la thep hat trik, katba u Santosh Teron (56′), u Tremarchwal Ch Marak (68′) bad u Raksabirong G Sangma (81′) ki la thep ïa kiwei pat ki kol na ka bynta ka Maram. U Sengsu G Momin (63′) u la pynkhih ïa ka shi kol na ka bynta ka Attong Matgrik.
Ka Group D ha Khliehriat ka la sakhi ïa ka Rymbai Shkenshynriah, kaba lamkhmat ïa ka Group, kaba la jop da 5-2 ïa ka Jalaphet Moochut Pyrdung SC. Ki kol jong ka Shkenshynriah ki la wan lyngba u Monush Lapang (1′), u Iaishah Bareh (44′, 68′), u Defence Nongtdu (90′) bad ka kol ba la kum thep hi da u rangïalehkai ka liang pyrshah ha ka minit kaba 80, katba u Daboomi Bareh (75′) bad u Davidson Bareh (79′) ki la pynkhihjar na ka bynta ka Jalaphet Pyrdung.
Ka Group B ha Shillong, ka Nangkiew Irat SC ka la pynliem noh da 6-2 ïa ka Mulang. U Wallamsuk Nongkhlaw (2′, 19′, 24′, 80′) u la pynkhihjar saw sien, nangta u Banshanlang Nongdhar (40′) bad u Neblejohn Lyngkhoi (84′) ki la thep mar kawei. Ka Mulang ka la pynkut noh ïa ka samoi ïalehkai jong ki da ka kol jong u Pynshngainlangki Hinge (75′) bad u Charmingstar Sungoh (82′).
Kin don ar tylli ki jingïalehkai ha kane ka sngi Palei, baroh kin sdang ha ka por 3 baje nohphai sngi. Ha Wahiajer ka Group E, ka jingïakhun kan long hapdeng ka Lamyrsiang SCC pyrshah ïa ka Iatyllilang Lumsehkot CSC katba ka Group G ha Williamnagar, ka A’chik SCO Rongjeng kan aireng pyrshah ïa ka Balmanduri FC.