Mynta ka sngi yn sdang ka SSA ïa ka U-20 Fourth Division 2026, 32 tylli ki kynhun ban shim bynta

Shillong, Jymmang 06: Ka aïom ki lympung ïalehkai phutbol jong ka Shillong Sports Association na ka bynta u snem 2026 kan sdang naduh mynta ka sngi Palei, ka 07 tarik Jymmang, ha kaba ka synjuk pynïaid kan sa ïoh ban sdang nyngkong ïa ka lympung U-20 Fourth Division. Ka jingïalehkai sdang kan long hapdeng ka Mawnianglah Youth bad ka Sei La Sap Football Coaching Centre ha ka por 4:30 baje nohphai sngi ha madan First Ground-SSA Stadium, Polo.
Ki don 32 tylli ki kynhun ne ki klob kiba la pyndep ïa ka jingpynrung kyrteng (kaba kiew na ka 29 tylli ha u snem ba la dep) bad la phiah ïa ki ha ki hynriew tylli ki Group ba mar san kynhun, lait noh tang ka Group D bad E kiba don mar hynriew tylli ki kynhun. Kawei kawei ka jingïalehkai la ai por 80 minit bad ka jaka kan long ha SSA Stadium ne ha MFA Ground ha Polo.
Ki ar tylli ki kynhun kiba wan hakhmat eh na kawei pa kawei ka Group kin jam shakhmat sha ka wat ïakhun kaba bud, ban sa phiah ha ki saw tylli ki thup (pool) ba mar lai tylli ki kynhun kawei kawei. Nangne, ki ar tylli ki kynhun kiba kynsai tam na kawei pa kawei ka pool kin rung sha ka wat ïakhun kaba tang shi wait ne knockout, kaba dei ka quarterfinal bud sa ka semifinal bad final.
ïa ka nam lahduh ha ka kyrdan Fourth Division jong u snem ba ladep la jop da ka Mawkasiang, katba ka Mawlynrei ka la wan kyrdan ba ar (runners-up). Nalor kitei ki arliang ba ïakhun phainal, ki ar tylli ki kynhun ba liem noh ha ka semifinal – ka Lapalang bad ka Lummawbah – ki la shah kyntiew kyrdan sha ka lympung Third Division mynta ka samoi.
Ki kynhun kiba la shah pynhiar kyrdan na ka Third Division ki long ka Madanrting, Imson, Gorkha Association bad ka Laitlyngkot.
Ki kynhun ki ban shim bynta ha kane ka lympung SSA U-20 Fourth Division 2026 ki long:
Group A – Imson SC, Them Rangskhen SC, Lumkseh SC, Riatsamthiah SC, Phir Kurbah Memorial SSCC;
Group B – Lumpyngngad SC, Laitlulong SC, Thynroit SCC, Mawpdang SC, Don Bosco Academy
Group C – Madanrting SC, Golflink SC, Mawlyngngad SC, Nongthymmai SCC Nongkynrih, Weilyngkut Area FCC.
Group D – Mawphlang SC, New Challenger SC, Mawshbuit SC, Pynthorbah SC, Nongkseh United SC, Nongpiur SSCC.
Group E – Laitkroh SC, Mawnianglah Youth SC, Summit FA, Umiew SCO, Sei La Sap SCC, Diengpasoh SCC.
Group F – Gorkha Association, Laitlyngkot SC, Iateilang SC, Pomura SC, Iatylli SCC.