MLA Mawkyrwat ngi kmen ba phi sengkam sengjam sha Ri-Bhoi tangba wat nion ïa u duk u suk: RBPC

Nongpoh, Naitung 23: Hadien ka jingeh kaba mih naka jingtih khyndew ban pynieng ïaka weighbridge haka jaka u Bah Renikton Lyngdoh Tongkhar u ba dei ruh u MLA ka Mawkyrwat haka shnong Pahamlang, Ri-Bhoi District kaba la wanrah ka jingshlei um kaba shyrkhei ha katei ka shnong, U Bah Jayson Lennox Nongrum President ka RBPC u la phah ka kyrwoh sha u MLA ka Mawkyrwat ba kum ka seng ka kmen ba u wan ban sengkam sengjam sha Ri-Bhoi hynrei um dei pat ban nion ïa u duk u suk, u kup shilliang sem shilliang.
U la ong ruh ba kum ka seng ka kmen lada ka don ka jingioh kam iohjam ki samla ha katei ka jaka hynrei kumba long mynta ka long da khongpong ka don ka jingshlei um, ka jingshah rah ki mar bam mardih, ki tiar ki tar, bad kum ka seng kam don kano kano ka jingbyrngem byrsit hynrei tang ka jingkyntu ba u Bah Renik u dei ban wan peit dala ka jong ka khmat ïa katei ka jaka bad lada um wan ban peit hi ka seng kan sa shong pyrkhat da kumwei namar kumba long mynta ka jaka jong u Bah Renik ka don hajrong bad kam don ka jingshah ktah katba ki longiing ba bun ki shah tap haka um.
U la ong ruh ba lada ki paidbah kim nud shuh ban shong ban sah ha katei ka jaka, ka seng kam banse ban phah sah ha katei ka jaka jong u Bah Renikton, namar ki don ki khun ki kti, ki ksiew bad naka liang ka seng ka kyntu ïa u Bah Renik, ïaka Dorbar Shnong bad kumjuh ruh ïaka bor sorkar ba ka dei ban shimkhia mardor namar kum ka seng kam kwah ban jia kano kano ka jingjia ba sngewsih haki por ban wan, u la bynrap.