Ban suk treikam yn thaw ka sorkar da kawei ka bor treikam ban peit ïa ka umbam umdih ha Shillong bad Tura

By Mawphor Editor On Jul 24, 2026

Shillong, Naitung 23 : Ka Sorkar Jylla ka dang pynkhreh ban wanrah ïa ka jingpynkylla kaba khraw ha ka rukom pynïaid ïa ka umbam umdih ha ki sor, da kaba thmu ban thaw ïa kawei ka bor treikam ban peit ïa ka jingsam um ha Shillong bad Tura, khnang ban pynduh ïa ka jingïakhlad kam hapdeng ki tnat bapher bapher.
Haba kren bad ki lad pathai khubor, u Myntri ka tnat Public Health Engineering (PHE), u Marcuise N. Marak, u la ong ba mynta ka jingsam umbam umdih ha Shillong bad Tura ka hap ha ki tnat bapher bapher, kaba ju wanrah ïa ka jingeh bad jingslem haba ki paidbah ki ujor halor ki jingeh kum ka jingbthei ki pipe um ne kiwei pat ki jingduna ha ka jingsam um.
Ha Shillong, ka tnat PHE ka pynpoi ïa ka um sha ka Shillong Municipal Board (SMB) bad Shillong Cantonment Board, kiba shimti pat ban sam ïa ka sha ki ïing jong ki paidbah.
U Marcuise Marak u la ong ba bunsien haba wan ka jingujor, ki ophisar ka PHE ki leit jurip hynrei hadien pat ki shem ba kam dei ka jaka ba ki dei ban peit, hynrei ka dei ka kam jong ka Municipal Board ne Cantonment Board. Kane ka jingïakhlad bynta ka pynslem ïa ka jingpynbeit ïa ki jingeh.
Ban weng ïa kane, ka sorkar ka dang treikam ban wanrah ïa ka rukom treikam kaba thymmai kaba don tang “kawei ka rukom, kawei ka platform bad kawei ka bor synshar”, kaban peit ïa baroh ka jingpynbiang bad jingsam umbam umdih ha Shillong bad kiwei ki bynta jong ka sor Shillong.
“Ngi la pyrkhat ban wanrah ïa kawei ka rukom treikam, kawei ka rynsan bad kawei ka bor synshar khnang ba yn lah ban pynbeit ïa baroh ki jingeh ha kajuh ka por bad ban pynlong ïa ka jingpynkylla kaba pura ha ka jingsam umbam umdih ha Shillong bad ka Shillong agglomeration,” ong u Marak.
U Myntri u la pyntip ruh ba ka sorkar ka thmu ban pyntreikam ïa kajuh ka rukom ha Tura, ha kaba mynta ka tnat PHE bad ka GHADC ki don bynta lang ha ka jingsam um.
U la ong ba shuwa ban pyntreikam ïa kane ka jingthmu, ka sorkar kan ïakren bad baroh ki bynta kiba ïadei. Hadien ka jingïasyllok ba pura yn sa shim ïa ka rai khatduh.
Na ka liang u Myntri u la ong ba ka jingthmu jong kane ka jingpynkylla ka long ban pynthikna ba ki jingujor jong ki paidbah kin ïoh jingïarap kloi, bad ba ka jingïakitkhlieh ha ka jingsam umbam umdih kan long kaba kham shai bad kaba seisoh.