Yn ai jinghikai ka Supercare Hospital halor ka Hepatitis bad kiwei ki jait jingpang ba dei bad u dohnud

Shillong, Naitung 23 : Ka Supercare Hospital, Shillong kan pynlong ïa ka prokram paidbah kaba neh saw sngi ban pynsngewthuh ïa ki paidbah shaphang ka jingpang Hepatitis bad kiwei ki jingpang kiba ïadei bad u dohnud, kum shi bynta ban rakhe ïa ka World Hepatitis Day 2026.
Katkum ka kyrwoh khubor, ïa kane ka prokram yn pynlong naduh ka 24 haduh ka 28 tarik u Naitung bad ka thmu ban pynsngewthuh ïa ki paidbah shaphang ki jait jingpang Hepatitis, ki lad jingïada, ka jingkongsan ban lap kloi ïa ka jingpang bad ban ïoh ïa ka jingsumar kaba biang. Ka prokram kan ai ruh ka jinghikai shaphang ka jingpang fatty liver, ka jingpang dohnud namar ka jingdih kyiad palat bad ka jingpang bampong ha u dohnud.
Katkum ka kyrwoh na ka Hospital la ïathuh ba ha ka 24 tarik yn pynlong ïa ka jingai jingtip paidbah halor ki jait Hepatitis A, B, C, D bad E, ka rukom saphriang jong ka jingpang, ki lad jingïada, ki tika bad ki jingsumar kiba don. Ha ka 25 tarik, ka hospital kan pynlong ïa ka jinghikai halor ka jinglap kloi ïa ki jingpang dohnud bad ki test bapher bapher, kynthup ïa ka FibroScan.
Ha ka 27 tarik, ki doktor kiba tbit kin ai jinghikai paidbah bad jubab ïa ki jingkylli ba ju mih halor ka jingpang Hepatitis bad kiwei ki jingpang kiba ïadei bad u dohnud. Katba ha ka 28 tarik, kaba dei ka World Hepatitis Day, ka hospital kan ai ei ïa ka jingsumar paidbah, kaba kynthup ïa ka jingïakynduh bad ki doktor, ki test Hepatitis B bad C, ka Hepatitis B vaccine, ka jingthew BP, Blood Sugar, rynïeng bad jingkhia, nalor ka jingai jingmut halor ka bam ka dih kaba tei met.
U Dr. R. S. Thangkhiew, Head ka Tnad Gastroenterology, Hepatology bad Interventional Endoscopy ha Supercare Hospital, u la ong ba bunsien ka jingpang Hepatitis ka long kaba jar hynrei lah ban ïada, ban lap bad ban sumar lada leh ha ka por kaba biang. U la kyntu ïa ki paidbah ban tip ïa ka jinglong jong ki ha kaba ïadei bad kane ka jingpang bad ban shim ïa ki lad jingïada ban sumar ïa ka koit ka khiah jong u dohnud.
Shuh shuh la ong ba ka Supercare Hospital ka khot sngewbha ïa ki paidbah baroh ban wan ïa shim bynta ha kane ka prokram ai jingtip bad ban shim kabu ïa ka lad jingsumar kabym donkam ban siew ha ka 28 tarik u Naitung 2026. La ong ruh ba ka jinglap kloi bad ka jingsumar ha ka por kaba biang ka long ka rukom kaba biang tam ban pynduna ïa ka jingban khia jong ka jingpang hepatitis bad kiwei de ki jingpang kiba jur ha kaba ïadei bad u dohnud.
Kane ka long katkum ka kyrwoh ba la phah da u Chief Operating Officer ka Hospital u Bah Damien Marwein.