Mih syndet bad sangeh treikam syndon ki Doctor ka Animal Husbandry ha khyrdop peit masi ha Umling

Nongpoh, Jymmang 16: Ki Doctor kiba ju peit ïaka koit ka khiah jong ki mrad kiba rung sha ka jylla daka jingbitar hynnin ka miet kila mih syndet bad khang khyrdep syndon ïaka jaka treikam jong ki kaba don ha syndah jong ka Umling Screening Center halor ka jingkynnoh kaba la mih naka jingbym sngewthuh jingmut bad kawei pat ka kynhun kaba peit bad khmih ïaki kot ki sla bad Challan ïaki mrad kiba rung sha ka jylla bala kynnoh ruh ba kidei ki kynhun jong ki High Level lane ki briew jong ki minister.
La kynnoh ruh ba dei naka jingbym sngewthuh jingmut bad kitei ki briew bala kynnoh ba kidei kiba la thung na High Level lyngba ka tnad Veterinary ba kitei ki doctor kim iohlad bha shuh ban talasi ïaki Health Certificate ban pynshisha ba ki mrad ki long kiba koit ba khiah kiba rung sha ka jylla naka bynta ban bamdoh, naduh ki masi, ki sniang bad kiwei kiwei hynrei la shu pynlait ïaki kali katba ki mon da kawei pat ka kynhun kaba don ha katei ka jaka hadien bala pynbiang ïaki number kali.
Watla ki nongthoh khubor kila pyrshang ruh ban ïakren bad kitei ki doctor kiba la sangeh syndet ka jingtreikam bad khang khyrdep syndon haka por kumba 10 baje eiei, hynrei naka liang jong ki kila kyntaid ban kren bad katkum ka jingtip bala ioh lum la kynnoh ruh ba katei kawei pat ka kynhun kaba ieng lang ha katei ka jaka kaba peit ïaki Challan bad kiwei kiwei ki kot ki sla kila pyrshang ban tuklar ïa katei ka khyrdop kiba la kam ruh bala thung da ka tnad Veterinary ban talasi ïaki Challan bad kiwei kiwei ki kot ki sla.