Shillong, Jylliew 25: Ka tnat bording jong ka jylla ka dang pynjur ïa ki jingthwet bad jingtohkit man ka sngi ban tehlakam ïa ka jingtuh bording ha kylleng ki bynta jong ka jylla.
U Commissioner & Secretary ba khmih ïa ka Power Department, u Sanjay Goyal, u la ong ba watla ka jingtuh bording kam pat long kaba jur bha, hynrei ka wanrah jingeh ïa ki nongpyndonkam kiba siew hok ïa ki bill bording jong ki.
Haba kren sha ki lad pathai khubor, u Goyal u la pyntip ba ka kynhun tohkit jong ka tnad ka trei ha baroh ka jylla bad ym tang ha ki katto katne ki jaka jong ka Garo Hills.
U la ong ba ka jingkhmih ïa ki kam be-aiñ ba ïadei bad ka jingtuh bording ka long ka bynta jong ka kam ba ju leh man ka sngi namar kane ka wanrah jingduhnong kaba khraw ïa ka corporation.
“Ki paidbah kidei ban sngewthuh ba ki kam be-aiñ kum kine ki ktah ym tang ïa ka tnat bording hynrei ruh ïa ki nongpyndonkam kiba hok, kiba ju shah ktah na ka jingduna ka bording ne kiwei pat ki jingeh ba mih na ka jingtuh bording be-aiñ,” u la ong.
Katkum ka jingïathuh jong u, ka jingtuh bording kam dei kaba jia ha kylleng ka jylla hynrei la lap tang ha ki katto katne ki jaka. Hynrei ka department ka dang shim ïa ki sienjam katkum ka aiñ pyrshah ïa kiba donkti ha kine ki kam.
U la kdew ba ka Electricity Act ka ai bor ïa ka department ban leh eiei pyrshah ïa kiba tuh bording, namar kane ka kam ka long pyrshah ïa ka aiñ bad ym lah ban shah.
Shuh shuh u ong ruh ba ka jingtuh bording ka wanrah ar bynta ki jingktah, kata kawei ka long ka jingduhnong pisa ïa ka corporation bad kawei pat ka long ka jingkit kaba kham khia ïa ki nongpyndonkam kiba siew hok ïa ka bording.
U la bynrap ba ka tnat tohkit ka dang bteng ban buddien bad lap ïa kiba donkti ha kine ki kam be-aiñ. Ynda la lap ïa ki, la pynmih ïa ki compensation bill katkum ka jingduhnong ba la mih bad bun na ki ki ju siew ïa kine ki bill.
Ka tnat bording ka la kyntu ruh ïa ki paidbah ban pyntip mar mar lada ki lap ïa kino kino ki jingtuh bording be-aiñ ha ki thain bad ki jaka jong ki.
