Pan jingkyrshan ka Synjuk ki Rangbah Kur ka Bri u Hynñiewtrep na JHADC halor ka jingshim jait na ka kmie

By Mawphor Editor On Jun 26, 2026

Jowai, Jylliew 25: Ka Synjuk ki Rangbah Kur ka Bri u Hynñiewtrep mynta ka sngi 25 tarik u Jylliew, 2026 kila wan hiar sha Jowai ban leit ïakynduh ïa u CEM ka Jaiñtia Hills Autonomous District Council ma Thombor Shiwat, ban pynsngew halor ka jingdonkam ban pynkhlaiñ ïa ka jingïadei kur bad ban pynskhem ïa ka rukom shim jait na ka kmie kaba long ka nong ïoh pateng.
Ka synjuk hadien ka jingïakynduh ïa u CEM haka jingkren sha ki lad pathai na ka liang u bah R L. Blah uba dei u Spokesperson ula ong naka liang ka Synjuk ki Rangbah Kur ka Bri u Hynñiewtrep kila wan khnang ban ïa kynduh ïa u CEM halor ki mat kiba ïadei bad ka jinglong tynrai haka imlang sahlang ka bri u Hynñiewtrep.
Shuh shuh ula pynsngew na ka liang jong ki ka Synjuk na Khasi Hills kala sngew donkam ban dawa ïa kane namar kala ktah ym tang ïa ka Khasi Hill hynrei ïa baroh kawei ka jait bynriew jong ka bri u Hynñiewtrep kynthup ïa la Jaiñtia Hills.
Haka jingïakynduh bad u CEM la donlang naduh u Deputy CEM, ki EM ka Council ha ryngkat ki dkhot ka Synjuk ki Rangbah Kur ka Bri u Hynñiewtrep kiba la wan khnang sha JHADC ban pan ka jingkyrshan ba pura ïaka KHADC ha kaba ïadei bad ka rukom ai jait sha ka kmie kaba long ka riti dustur naduh ki por mynshwa bad ka synjuk kam kwah ban pynduh pyndam ïa kane.
Na ka liang u CEM ruh ula kular ba ka JHADC kan shim khia bad ai jingkyrshan ïa kane ka jingdawa, halor kane ka bynta na ka liang ki Waheh Kur napoh ka Ri-Lum Jaiñtia ruh kila mih shakhmat ban dawa ïa kane ka juh bad la khmih lynti ba ka Council kan leh ïa kaba donkam.
Katba ha kaba ïadei bad ka aiñ bala pynmih da ka KHADC hynnin ka sngi ha kaba ïadei bad ka thoh ka tar na ka bynta ka die ka thied ïa ki jaka ki puta, ha kaba ki Syiem ki Dorbar Shnong kim don bor shuh bad kane ka aiñ kan ïalam shano shano, la pynsngew u bah Blah.
Ka Synjuk ka khot ïa baroh ki Synjuk Rangbah kur, ki Synjuk Rangbah Shnong ban ïasnohkti lang ban dawa pynduh pyndam noh shi syndon ïa kum kine ki aiñ kiba lah ban ktah ïaka ri bad ka jait bynriew.
U bah R L Kharpran President Synjuk ki Rangbah Kur ula pynpaw ka jingsngewkhia ban ïoh leit ïakynduh ïa u CEM ka JHADC halor ka jingshim jait na u Kpa kaba la pur sha ki rynsan Social Media kum ka jaitbynriew kaba tip kur tih kha, tip briew tip blei bad kamai ïa ka hok ka ïeng ha ka nongrim ban pynneh pynsah ïa ka riti dustur ban shim ïa ka jait na ka kmie
Kila ïawer ïa ki Kur ki Jait kiba don haka Dorbar ki Waheh Kur jong ka Ri-Lum Jaiñtia bad ka JHADC ba ïatrei lang ïa kane ka juh ka jingthmu kumba la don ha KHADC kata ban shim jait na ka kmie khnang ba ka lawei kan long kaba shngaiñ.