Khliehriat jylliew 25: Ka ophis jong ka District Social Welfare Officer (DSWO), East Jaiñtia Hills District mynta ka sngi ka la pynlong biang sa kawei ka prokram jingpynshai paidbah ha ïew Khliehriat kaba ai jingpynshai halor ka jingshyrkhei u drok bad kane ka dei ruh shibynta ka jingrakhe ïa kasngi pyrshah drok lane ka International Day Against Drug Abuse and Illicit Trafficking, ïa kane ka prokram la tip ruh kum ka Flash Mob Awareness Campaign kaba hapoh ka Nasha Mukt Bharat Abhiyaan (NMBA).
Haba kren ha ka jingialang, ka Programme Manager, Mih-Myntdu Community Social Welfare Association (MCSWA), Khliehriat, ka kong R. Patlong, ka la kren halor ka jingdonkam kane ka sngi kaba dei ka International Day Against Drug Abuse and Illicit Trafficking, kaba ju pynlong man la u snem ha ka 26 tarik u bnai jylliew, ka la ong ruh ba ym tang ha kane ka sngi hynrei hapoh ka district la ju pynlong bunsien bha bad mynta baroh shi taïew ruh la pynlong ïa ki prokram ai jingpynshai ha kaba ïadei bad ka jingshyrkhei u drok bad ka jingshah ktah ka imlang ka sahlang na ka daw u drok.
Ka kong Patlong ka la pynsngew shuh shuh ba kane ka prokram Nasha Mukt Bharat Abhiyaan, ka dei kaba la pynbna paidbah da u Myntri rangbah duh ka ri, u Narendra Modi naduh u snem 2020 kaba don ïa ka thong ban pynlong ïa ka ri India kaba lait na u drok, ka kong Patlong kaba dei ka Programme Manager MCSWA ka kyntu ïa ki paidbah nongshong shnong khamtam ki samla ba ki dei ban kiar na u drok, ka kyntu ïa baroh ba ki dei ban iasnohkti lang kawei ban pynlong ïa ka imlang ka sahlang kaba lait na u drok.
Ha kane ka prokram, ki samla pule jong ka Jaiñtia Eastern College Khliehriat ki la pyni rynsan ïa kawei ka jingshad kaba don jingmut kaba pyni ïa ka jingsniew ba mih na kaba dih drok, lyngba ka jingshad ka ai mynsiem ruh ïa ki paidbah bad pynsngewthuh ïa ki paidbah ban don ka jingkitkhlieh halor kumno ban im ka jingim kaba lait na u drok bad ruh ban pynlong ïa ka imlang ka sahlang kaba koit ba khiah kaba lait na ka jingshyrkhei u drok.
Ka kong R. Patlong, ka la lam khmat ruh ha ka jingshim ïa ki kyntien jingkular lane ka pledge ba la ïashimbynta lang da baroh ki paidbah, ki kyntien jingkular ban pynlong ïa ka imlang sahlang kaba lait na u drok, ha kane ka prokram ka la don ruh ka jingiaphylliew jingmut da ki jingkylli bad ki jubab ba la iashimbynta da ki paidbah halor ka mat ba iadei bad ki jingeh kiba mih na u drok, kumno ban iaida ban lait na u drok bad la iakren ruh halor ka jingdonkam ki jaka sumar kum ki Rehabilitation Center.
