Shillong, ïaïong, 25: U Muktiar ba pawkhmat jong ka Jylla u Bah VGK Kynta u la iehnoh ïa ka jinglong dkhot hapoh ha party BJP da kaba kynnoh ba ki nongïalam jong kane ka party ki la leh bym suidñiew ïa u.
U Bah Kynta u la mih noh na kane ka party hadien ba u la pynïasoh bad ka BJP ha u bnai Naiwieng, 2022 shwa ba ka Jylla Meghalaya kan leit sha ka elekshon jong ka Iingdorbar Thawaiñ kaba la long ha u bnai Rymphang, 2023.
“Naduh ka sngi ba nga la pynïasoh bad ka party kim ju aikam bad kim ju khot hi ruh ïa nga sha kino kino ki jingïalang haduh mynta,” ong u Bah Kynta ha ka jingïakren bad ki lad pathai khubor ha Shillong Press Club ha ka sngi Baar.
“Ka long kaei kaei kaba sngewsih namarba nga la pynïasoh bad kane ka party da ka jingthmu ban trei na ka bynta ka bha ka miat jong ka jylla bad na ka bynta jong ki paidbah nongshong shnong,” u la bynrap.
U Bah Kynta, shuh shuh u la ïathuh ba um kwah ban don hapoh ka party tang ban shah pyndonkam kum u tiar buhkai ban shu pynieng ha kyndong.
“Nga dei u briew uba ieid ban trei. Namarba ngam ju ïohkam eiei haduh mynta, namarkata, ka dei ka kamram jong nga ban iehnoh ïa ka jinglong riewdkhot bad kane ka seng saiñpyrthei,” ong u Bah Kynta bad bynrap, “lehse na ki rukom kren jong nga ki lah ban ym ïahap satia bad ka jingsngew jong ki nongïalam ka BJP.”
“Nga dei u briew u bym ju kren shalyndet, nga kren beit markhmat haba nga donkam ban kren ïa kano kano ka mat kaba donkam. Haba ngam sngewtynnat, nga kren beit…lehse na ki rukom kren jong nga, na ki rukom pynpaw ïa ki jingsngew jong nga kam pynsngewtynnat satia ïa ki nongïalam ka BJP,” u la ong.
Haba kylli, u Bah Kynta u la ong, ba ka jingjop ba khlem pud jong u Bah Alexander L. Hek bad u Bah Sanbor Shullai ha ki elekshon kam dei satia ba ki paidbah jong ka Pynthorumkhrah bad ka South Shillong Constituency ki peit ïa ka party BJP hynrei ka dei hi ba ki paidbah peit ïa u briew namarba kine ki arngut ki dei ki briew kiba trei bha hapoh ki Constituency ki jong ki.
