Shillong, Iaiong 25: Ka Hynniewtrep Youth Council (HYC) mynta ka sngi, kala dawa ban tohkit halor ka jingkhie bad pur kynsan ka jingpang khieshoh hapdeng ki Nongshong shnong ka thaiñ Shella bad kiwei ki shnong marjan bad ha ka juh ka por ka dawa ban pynbit pynbit ïa ki jingdonkam hapoh ki jaka sumar kum ka Ichamati CHC bad Shella PHC.
Ka HYC central body bad Shella Area Unit ka la phah da ka dorkhas sha ka ophis District Medical & Health Officer (DM&HO) East Khasi Hills ban tuklar mardor.
“Ngi dawa ban pynbiang ïaki dawai dashin na ka bynta kito kiba ïoh pang jingpang khieshoh ha Ichamati CHC bad Shella PHC bad ha kajuh ka por ban tohkit kumno kane ka jingpang ka sdang kiew kynsan ha kane ka thaiñ” la ong ka dorkhas.
Ka seng ka la kyntu ïa ka ophis DM&HO ban shim khia halor ka jingbym biang ki lad jingsumar hapoh ka Shella PHC bad Ichamati CHC kiba hap hapoh ka Sohra Civil Sub-Division.
“Ngi la ïoh jingtip ba kala don kawei ka jingjia ha kaba iwei i khynnah ila ïoh pang khieshoh bad ila leit ban shim dawai na Shella PHC hynrei hadien ba la eksamin la lap ba kane ka jaka sumar kam biang ki lad jingsumar bad la pynkynriah noh ïa i sha Ichamati CHC kaba jngai kumba 13-15 kms hynrei haba poi ha kane ka jaka sumar ruh la lap ba kane ka CHC kam don bad kam biang ki lad sumar bad la pynkynriah biang sha Sohra CHC kaba jngai kumba 45 Kms na Shella” la ong ka dorkhas.
Haba ïadei bad kane ka HYC kala ong ba ka seng kam lah ban pdiang namar ka Ichamati CHC, ka dei ka First Referral Unit (FRU) na kiwei pat ki PHC ba marjan kaba kane ka jaka sumar ka shakri ïa ki paidbah na ki shnong ba marjan hynrei la shem pynban ba kane ka jaka sumar ruh kam don dawai jingpang khieshoh.
Haba pynpaw ba kane ka jingpang khieshoh ka lah ban bit na ki briew, naka liang ka HYC ka la kyntu ïa ka ophis DM&HO ban leh ïa kaba donkam bad ban bthah ïa ki ophisar ka Shella PHC ban pynlong ka jingtohkit, ba kumno kane ka jingpang khie shoh ka sdang hapoh kane ka thaiñ khnang ban tehlakam ïaka jingsaphriang kaba lah ban ktah ïa kiwei pat ha kine ki shnong ba marjan.
