Shillong, Ïaïong 25 : Hadien ka jingsdang pynibor jong ka Viswa Hindu Parishad (VHP) pyrshah ïa ki khristan da kaba pyrta ‘Jai Sreeram” hakhmat Ïingmane Balang Presbyterian Laban ha ka 2 tarik jong une u bnai ha ka jingïaïaid paidbah, mynta pat sa kawei ka tnat jong ka Sangh Parivaar ba la tip kum ka Rashtriya Swayamsevak Sangh (RSS) ka la sdang ban ïeng rasong bad suhthied ha kane ka jaidbynriew KhasiPnar jong ngi. La sakhi ïa kata ha ka jingïalang ha State Central Library Shillong u snem ba la lah ha kaba u Dr Mohan Bhagwat, Sarsanghchalak jong ka RSS u la nud ban kren kynthoh ba baroh kiba im ba sah ha Meghalaya ki dei ki Hindu ha kaba la synran lang ha ka rynsan da u Munujik Khongjirem President RSS East Khasi Hills & Ri Bhoi, ïa ka jingkren kaba la pynkylla sha ka Khasi da u Makashang Khongshei bad la kren ai khublei da u Niewstor Syiemlieh,Baudhik Pramuk East Khasi Hills nalor kiwei pat kita ki Sanghchalak.
Kumba ngi la sakhi lyngba ki news channel bad social media,kumba 500 ngut ki sevaks jong ka RSS ki la ïaid procession na Keating Road, Police Bazar ter ter shaduh Contonment Lukier Road myn sngi u Blei 23.03.2023. Kat kum u Pawnam Khongsngi General Secretary RSS, East Khasi Hills Unit, u ong ba ka RSS ka la don lypa ha Meghalaya naduh ka snem 1972 bad ha North East naduh ka 1946.U la ong ruh wat la ngi la don palat 51 snem ha Meghalaya ngim pat ju pynkylla niam hindu ïa uwei ruh. U ong ba ka ktien pynkylla niam ka dei ka ktien nongwei. U nongthoh u kwah ban pynkynmaw ba u Bah Hipshon Roy Kharshiing uwei na ki Rangbah ka Seng Khasi,u ong ba ka Seng Khasi ka long la ka jong hi, kam don jingïadei ei ei bad ka niam Hindu jong u Khar u klieng, namar ka Seng Khasi Niamtré ka don la ka jong ka durstur ka riti, ka tipbriew ka tipblei.Te balei pat ba ka RSS ka lehjan haduh katta katta sha katei ka niam, hato ym dei ba ka ïohi ba dei ka shrah kaba seisoh na ka bynta ka hindutva ideology jong ka ï. Lada utei u rangbah u ong ba ka RSS kam ju pynkylla niam, balei pat dei u Mohan Bhagwat u ong ba baroh kiba shongshnong hangne mynnyngkong ki dei ki Hindu, balei pat ba pynkylla biang sha ka niam hindu da ki spah ngut ha Chattishgarh, Madhya Pradsh, Uttar Pradesh, Gujarat, Odisha bad hawei bad wat ha Assam ruhï. U Khasi um ju thoh shyllangmat lane tah syndur,um ju rah trishul lane luta, hynrei ki ngeit ba u syiar u dei u nongprat lynti, kim ju mane ïa ki bseiñ, ïa ka masi ne ïa ki shrieh ki tngaw, ki nongïalam jong ka kim ju ïaid lyngkhuid kumba leh ki pukir lane sadhu ha ka Kumbhmela, namar ki jong ngi ki dei ki riew don akor donburom.
Hynrei tang kawei ngi tip, ba ka jingïaid suki jai (low profile) jong ka RSS napoh napoh baroh shikatta ka dei tang namar ba kam don ka sorkar ka ban kyrshan lem ïa ka nadien kumba leh ka BJP mynta. Mynta pat de namar bad BJP bad kiwei ki seng hindu kum ka Vishwa Hindu Parishad (VHP), Akhil Bharatiya Vidyarthi Parishad (ABVP), Bajrang Dal,Bharatiya Kisan Sangh bad kiwei pat ki mih na kajuh ka tyllong jong ka Sangh Parivaar te ki la shlur ban mih pyrthei bad lada lah wat ba pynurlong noh kloi ïa ka India kum ka Hindu state nakhlieh hakjat, kaba mut kawei ka niam, kawei ka kolshor bad kawei ka ktien. Balei ngi ong kumta, to ngin ïa peit; ha ka kotkhubor “The Print” dated 27 February 2023 (02:21pm IST) hapoh ka shatri jong ka ‘Ghar Wapsi’ ki lyngdohniam kynthei jong ka RSS ha Chhattisgarh ki la hiar ban ai ïa ka jingpynsaitkjat khunsyiem ïa 36 tylli ki longiing riewlum Catholic kum ka dak ban ban pdiang sngewbha ïa ki ba ki la wanphai biang sha u tnum jong ka niam Hindu. La kane ka jingïalang la pynlong da ka RSS Dharma Jagaran Samity ha kane ka taïew ba la dep.Ka tyllong khubor ka sakhi ruh haduh kane ka jingpynkylla niam biang ïa ki briew ka jia lyngba ka jingtreikam jong ka politics.La ong ba ha ka taïew balai jong u Rymphang ha Jashpur district ki dkhot jong ka Rshtriya Swayamsevak Sangh (RSS),ka jabieng pyrkhat pyrdaiñ jong ka BJP ki pynkhreh ia ki laiphew jait ki jingialang.Ha ka 21.02.2023, kane ka tyllong khubor ka sakhi ia ki 36 tylli ki longïing kiba ïa shim bynta ha ki programme bapher jong ka jinglehniam – da kaba sdang shwa na kata ka jingpynkhuid (shuddhikaran) hadien ba ki ong la wanphai biang sha ka niam Hindu.
Ha katei ka jinglehniam pdiang burom ,la ïohi bun ngut ki dkhot bad ki heh jong ka RSS bad kiba wan na ka longiing jong ki syiem jong ka Jashpur. Kaba kham kongsan na ka programme dei ki lyngdoh niam kynthei ba la tip kum ki mata pujaris, ka dei ka seng kynthei jong ka RSS ba ki shait buh ha ki temple barit. Ka Jingwanphai pat (Ghar Wapsi) kam shym jia tang shimiet,ki volunteer jong ki ki trei shitom ban pynkohnguh jubor ia ki briew ban wanphai sha ka niam Hindu, ong u kapil Shastri,u RSS prancharak bad uba long ruh u incharge jong ka Dharma Jagaran Samity jong katei ka Jylla. Ki ong ba na ki 29 tylli ki district,18 tylli dei kiba la shah ktah bha ka jingpynkylla niam da ki missionary. Lada ngim trei noh mynta, ka Chhattisgarh shen kan kylla long ka jylla Khristan,u la kynthoh.Kumno ka jingwanphai pat ka trei kam,u ong, ngi don ki temple barit ha ki shnong ba tip kum ki ‘dhams’.Kine ki dhams ki dei ki centre na ka bynta ka Ghar Wapsi.Tang ha jashpur la ong ba ki don haduh 112 tylli ki dhams kiba trei naduh tynrai kum ki primary network.Don ruh ki committee kiba kynthup ia ki rangbah bad ki longkmie kum ki volunteer.Ym kum ha Uttar Pradesh bad Uttarkhand ba la don lypa ka ‘Aiñ pyrshah pynkylla niam’ ha Chhttisgarh la suhlang ia ka imlang sahlang ryngkat ba ka sain pyrthei ba la tip kum ka dharmantaran (tribals converting to Christianity) bad ka Ghar Wapsi. Ha ka sngi Hatmajai babud, wat ka ïingsyiem ruh, u Pratap Singh Judev u la sait ia ki kjat jong ki tribal ban pynkylla niam biang sha ki Hindu.
Nangta,ha ka 16 December 2022 u Superintendent of Police, Assam Kahilipara – Guwahati-19, u la thoh ïa kawei ka shithi sha ki CID Branch ban thwet bad peitngor ia ka jingïalapniam jong ki Khristan bad ban ai report halor ka jingpynkylla niam jong ki hapoh kine ki hynriew snem. Ban shim kyrteng ïa ki nongialam niam bad ba ki khristan ki dei ban ïoh jingbit shwa na ki, hashwa ba kin pynlong jingïaseng ne kino kino ki programme. Nangta, kat kum ka report jong ka kotkhubor “ The Wire bad East Mojo” ha ka 12.02.2023 kawei ka seng synrop bad ka RSS ba la tip kum ka Janajati Dharma Sanskriti Suraksha Manch (JDSSM) ki la ïaid procession sha Dispur lyngba ka programme “Challo Dispur” ban leit ai dorkhas sha ka sorkar ban dawa ba ka sorkar Assam bad sorkar Kmie ki dei ban pynduh noh shisyndon ïa ka Hok long Schedule Tribe (ST status) ki Khristan ha India, kaba ailad ïa ki khristan ban ïohkam da kaba suk lyngba ka reservation ïa ki. Kata, ka sorkarkmie ka dei ban amend noh ïa ka Art.342A bad Art. 341.(The Wire 07.02.2023).
Kita ki khrawpyrkhat bad ki riewwadbniah (Seers & Scholars) jong ka RSS ha u bnai August jong ka snem 2022 ki la draft haduh 32 page ïa ka Jingthmu ban pynlong ïa ka India kum ka “Hindu Rashtra” ïa kaba ki la dep passed myn ha une u bnai February 2023 ha kata ka jingïalang “Dharma Sansad” ha Prayagraj, (mynshwa Allahabad) Uttar Pradesh. Ha kata ka draft la pruid dak ym tang ban pynduh noh ïa ka Hok jied nongmihkhmat (adult franchise) ne voting rights jong ki Khristan hynrei la thoh ruh ba kin pynkynriah noh ïa ka nongbah Delhi sha Varanasi bad ïa ka Parliament House ruh yn pynkynriah sha Kashi, Varanasi, Gujarat ha kaba kin pynlong noh da ka “Parliament of Religions” bad baroh ki 543 ngut ki dkhot yn jied sha kata ka parliament. (The Economic Times Aug.13,2022 & 17.02.2023).
U Yogi Adityanath CM jong ka Uttar Pradesh ha ka jingkren kum u kongsan ha ka jingïalang jong ka “Banjara Kumbh 2023” ha Jamner Jalgaon district, Mumbai, ha kaba ki heh jong ka Rashtriya Swayamsevak Sangh (RSS) ki ïa donlang khrui, u ong, “ba dei ban pyntreikam noh kloi ïa ka aiñ Anti-Conversion Act ha baroh ka ri India kumba u la leh ha Uttar Pradesh naduh ka snem 2020 bad ban pynshitom bad set along haduh 10 snem lynter ïa kiba ïalap khristan, hynrei bad pdiang burom pat khlem da pynshitom ïa kiba wanphai kylla sha ka niam Hindu lyngba kata ka “Ghar Wapsi Scheme” (Indian Express January 31,2023). Dangshen ha Chattisgarh la kyntait ban aibylla haduh 9 tylli ki longiing khristan na kino kino ki central scheme tang na ka daw ba ki long khristan.
Nangta,ka jingshah lehbeiñ ki khristan ha Kandhmal Odisha naduh ka 23.8.2008, kaba dei ka sohkhliang haduh mynta ïa ka India, ka dei hadien ka jingshahsiat ïap jong u Swami Laxmanananda Swaraswati ha ki lehnoh Maoist (bad ïohkem ruh ïa ki nongsiat), uba pynshit ban pynduhjait ïa ki khristan uba pynbna ruh hana ba phah ki blei ïa u naduh ki lum himalaya ban leh ïa kata ka kam, kaba ki hindu ki tharai sniew lypa ba dei ki khristan kiba leh ïa kata ka kam. U Anto Akkara u journalist ba pawnam ha kaba u la pynmih ïa kawei ka documentary kaba u ai kyrteng “The voice from the Ruins of Kandhamal (In search of Justice).
Hangne, u la pyni lut ïa ka jingshah thombor ki khristan ha district Kandhamal,Odisha (Orissa) naduh ka 23 rd August 2008 haduh 2009..ha kaba palat 300 tylli ki iingmane la thang bad la shah pynpra ha ki riewshitniam Hindu ha ka kyrteng jong ka Bajrang Dal bad Vishwa Hindu Parishad bad la pynkylla phetwir (refugee) ia palat 56,000 ngut ki khristan, bad 39 ngut ki khristan kiba la kylla martyr…tang na ka jingkynnoh ba ki khristan ki siat iap ia u Swami Laxmanananda Swaraswati. Wat ha katei ka jingshah pynïap utei u heh ki hindu ruh, la kem bad set byndi ïa 7 ngut ki khristan kiba lui lui haduh 11 snem khlem ki sakhi kiba biang…kat haduh ba ka Supreme Court ka la rai ban pynksan bad pynlait noh ïa ki hadien 11 snem.
Kaei kaba sheptieng ka long, ba ïoh ka local Unit jong ka RSS ruh ynda ka la khlaiñ kan ïa pynibor bad kiwei pat ki niam hangne namar la trained ïa ki sevaks (cadres) jong ka kum ha Nagpur bad hawei kumno ban pyndonkam wat ïa ki tiar pynmynsaw ruh. Kyrmen ba kan nym kynshoit ia ka lyer jong ka jingsngewpherniam. Ka Meghalaya, wat la bunbah ki nongshongshnong hangne kiba pdiang ïa ka niam khristan naduh 1841 ter ter, kam don satia kata ka ‘force conversion’ ne pynkylla niam jubor kumba la kynnoh, ka dei ka mon ba laitluid jong u riewshimet ban jied, bad ki nongshongshnong ki ïa imsuk imsaiñ bad ki bym dei khristan ruh, haba ïap ba im ki ïarung ïamih kumjuh ha ka khawai ka dawai, kam ju don satia kata ka ïasang (outcaste ne class-system) bad kiwei pat, hynrei ki ideology jong ka RSS ka long ban pynduh noh ïa ka niam khristan bad ïa kiwei ban ïeng rasong tang ma ka. Ïa ka India ym shym la pynlong tang ki Hindu, ki khristan bad kiwei ruh ki don shibun u synniang u bynhei na ka bynta ka jingkyntiew ïa ka ri naduh ka por ka sorkar Bilat. Kaba tieng lada ñiom jubor ïoh ka mih pynban ka thma pohiing ha ka ri kumba jia ha Syria,Iraq bad hawei, mano ban kitkhlieh ïa kata.
Kumta,ka jinghiarthma bajar jar jong ki Hindu dei ban da ïa husiar bha namar ka jingthmu ka long ban pynduh noh ïa ka jingmaneblei ba laitluid (secular India) kaba la kdew ha ka Fundamental Rights jong ka Constitution. Ngi kyrmen ba ka Unit hangne kan nym kup durbula ïa ka durkhmat jong kata ka agenda jingïada ri jong ki kumba leh ha kiwei pat ki jylla.
