Mih ki paidbah ha Byrnihat ban pyrshah ba jur ka jingpynjaboh ïa ka lyer na ka tdem ki kharkana

0

Nongpoh, K’lyngkot 25 : Da ki spah ngut ki nongshong shnong ka thaiñ Byrnihat,mynta ka sngi Saitjaiñ kila mih paidbah ban pynpaw ka jingsngewkhia bad pyrshah jur halor ka jingbym leh eiei ka Sorkar ban tehlakam ïa ka jingpynmih lyer bih jong ki karkhana lyngba ki puipui kiba buh ïa ka koit ka khiah ki paidbah ha ka jingma.
Ki paidbah na kylleng ki Shnong kila pynlong ia ka jingïaid paidbah naduh ka shnong Harlibagan haduh Dehalbagan ban pynpaw ïa ka jingsngewkhia kaba jur ïa ka jingbym lei eiei ka Meghalaya State Pollution Control Board (MSPCB) ban tehlakam ïa ka jingpynmih tdem bad pui pui jong ki karkhana kaba la ktah ïa ka lyer ban ring mynsiem ha ka thaiñ.
ïa kane ka rally la lamkhmat da u Bah Phrangsngi Syngkli, Lyngdoh Raid ka Nongkylla ha ka jingïadonlang ruh da ki Rangbah Shnong na ki Shnong ka thaiñ Byrnihat lem bad ki spah ngut ki nongshong shnong.
Kumba la pynpaw da ki nongkren, ka jingsngewkhia ka long halor ka jingmynthi jong ki bor Sorkar jylla ban shimkhia ban weng mardor ïa kane ka jingeh ba la mad da u paidbah wat hadien bala dep ban pynbna ruh ba ka thaiñ Byrnihat ka dei ka thaiñ kaba jakhlia bha ka lyer namar ka jingdon bun tylli ki karkhana.
“Ka jingpynmih jong ki karkhana ïa ka tdem bad pui pui ka la ktah shikatdei ïa ki nongshong shnong, ki khynnah skul namar kane ka tdem ïong ka la pynjakhlia ruh wat ïa ki umbam Umdih bad pynjakhlia ruh ïa ki ïing ki sem. Don ruh bun na ki nongshong shnong kiba la ngat ïa ki jingpang kum ka Asthma, TB bad Cancer tang namar ba ring mynsiem ïa ka tdem bad puipui ïong kaba mih na ki karkhana”, pynpaw ki nongkren.
Ki la ong ruh ba na ka liang ki paidbah ki la dawa ba ka sorkar jylla kan shimkhia noh mardor ban weng ïa kane ka jingeh u paidbah lym kumta kim banse ban shim da ki lad kiba tyngeh da kaba leit khang tala ïa ki karkhana bapher bapher.

Leave A Reply

Your email address will not be published.