Shaniah ïa u ‘Pa trai u tip kham bha ïa ka Constituency, ong u Bah Sanbor

0

Shillong, K’Lyngkot 25 : U MLA ka Shillong South Constituency Bah Sanbor Shullai u la ong ba ki paidbah ki dei ban shaniah ïa u Kpa trai namar tip khambha ïa ka jingdonkam ki paidbah ha ka constituency.
Ïa kane u Bah Sanbor u la kren ha ka jingïalang plie paidbah ïa ki surok ïaid kali ha Mynsaiñ Lumparing bad ruh ïa ka surok ba pynheh bad tap ïa ki nala bad pynlong ïa ki kum ki jaka ïeng ha kali ha Mawnei, Laban.
Ha ryngkat ka jingdonlang ki nongïalam shnong, na ka liang u Bah Sanbor u la Ïaroh ïa ki trai jaka kiba la ai sngewbha ïa ki jaka namar ki thrang ban ïohi noh ïa ka surok ba kan poi ha ki dong jong ki.
“Ki paidbah mynta la 40 snem ki la thrang ba ka surok kan poi noh hajan iing jong ki bad mynta ka sngi ka la urlong da ka jingkylluid mynsiem jong ki ban ai sngewbha ïa ki jaka khlem da donkam ban siew pisa,” ong u Bah Sanbor da kaba ïaroh ïa ki nongshong shnong kiba lapyni ïa ka nuksa kaba bha sha kiwei pat ki constituency.
Une u nongmihkhmat u la ong ruh ba da ka jingpoi jong ka surok haduh jan iing kan ïarap khamtam eh haba don ki bahaiing ha sem kiba pang ba shitom namar ym donkam shuh ban kit da ka met ïa kiba pang namar ka ambulance ka la poi haduh jan iing.
Katba na ha Mawnei pat u la ong ba ka jingtap noh ïa ki nala ka wanrah ïa ka khuid ka suba bad ha kajuh ka por la ïoh ban pyndonkam kum ka jaka pynïeng kali nalor ba la pynheh bad sïang rong ïa ka surok.
Nalorkata, u ong ruh ba da ka jingtap noh da ka dewbilat ïa ka nala um kaba heh ha baroh shi lynter bad pynlong ïa ka kum ka jaka ieng kali kan ïarap ruh ïa ki paidbah wat ban pyndonkam ïa kane ka jaka haba don ki jingjïa ba sngewsih lane don ki prokram ha shnong ha thaw bad wat ha ka khawai dawai.
“Kaba kham kongsan ka long ba ki paidbah kin ym ïoh shuh ban bret pathar ïa ki jaboh jabain shapoh ka wah bad kawei ruh ka jingsma kan ym mih shuh na kane ka wah namar la tap lut baroh,” ong u Bah Sanbor.
Shuh shuh la pyntip ba na bynta ka surok ha Mynsaiñ Lumparing la mang ha ka jinglut kaba kot sha ka 1.38 klur tam katba ïa ka surok rong bad jaka pynieng kali ha Mawnei la tei ha ka jinglut kaba 1.13 klur tam.

Leave A Reply

Your email address will not be published.