Khyllem ka jingkieng Wahlyngdoh Maweit, hap ka trok kit mawria shapoh wah

Shillong, K’Lyngkot 25 : Ka jingkieng dieng kaba don ha ka shnong Wahlyngdoh kumba 21 kilometer ei ei na Nongstoiñ, ka la khyllem noh ha ka janmiet sngi Saitjaiñ bad jia ryngkhat ha kane ka jingjïa kawei ka trok kit mawria ka la hap sha riat.
Katkum ki khubor ba la ïoh lum, la ïathuh ba kane ka trok kadei kaba kit maw na ka bynta ban shna ïa ka surok Nongstoiñ Maweit kaba dang ïaid mynta shakhmat. La ïoh jingtip ruh ba u nongniah jong kane ka trok u la mynsaw ha kane ka jingjia.
Na ka liang ki paidbah ka thain ki la ïathuh ruh ba ka jingkhyllem jong kane ka jingkieng kan buh jingeh ïa ki paidbah nongshong shnong jong ka Wahlyngdoh Maweit namar ka surok sub-way kaba shu shna shipor kan shem shitom bha ïa ki kali kamai ban ïaid.
Kumta, ki la ong ba katba ym pat dep ban shna da kawei pat ka jingkieng ka leit ka wan ha katei ka thaiñ kan sa ktah jur bha.
Katkum ka jingpynpaw da ki paidbah na ka por sha ka por la ong ba kane ka jingkieng kadei ka jingim na bynta ki 35 ne 40 tylli ki shnong kiba don sharum jong katei ka jingkieng bad kumta da ka jingtwa noh jong ka, kan sa ktah jur ïa kitei ki phew tylli ki shnong.