Ba wan ka Synod kylla dur bun ki jaka ha ka thaiñ Umlyngka

0

Shillong, K’Lyngkot 25 : Ka jingpynkhreh na ka bynta ka Synod kaban long ha u Lber mynta u snem ha ka shnong Umlyngka ka la ïaid shaid shaid khamtam eh haba ïadei bad ka jingpynbha bad ka jingsiang rong ïa ki surok naduh Mawsyiem Umlyngka ter ter sha Mawdumdum haduh Nongkseh Syllei kaba jrong kumba 1.595 kilometer.
Ban buddien halor kane ka jingpyntrei, u Chief Adiviser jong u Myntri Rangbah ka Jylla Bah Hamlet Dohling ba dei ruh u MLA barim ka Mylliem u la leit ban buddien ïa kane ka jingpyntrei ha ryngkat ka jingdonlang ki Engineer ka tnad PWD, ki nongïalam shnong ka Umlyngka bad ruh ki nongïalam Balang.
Ha kane ka sngi u Bah Hamlet u la ïathuh ba ka jingjurip ka long ban buddien ïa baroh ki jingpynkhreh khnang ba kin dep lut ha shwa ka por.
Na ka liang ka Balang kumjuh ruh na ki nongïalam shnong ki la pynpaw ka jingsngewnguh ïa u Bah Hamlet halor ka jignshimkhia jong u ban pynïoh bad ruh wat ban buddien khnang ba kane ka Synod kan long kaba iphuh bad shongkun.
“Ka jingwan jong kane ka jingïaseng ka kylla long ka jingkyrkhu ïa ki nongshong shnong namar la bha ki surok bad ruh ki surok ki la poi sha ki jaka bym pat don surok. Kum u Rangbah Shnong nga sngew kmen ba kum ki nongshong shnong ki ïa kynduh ka long ka jingmaramot biang ïa ki surok shnong kiba don ha ka shnong baroh kawei,” ong u Rangbah Shnong.
U ong ruh ba kane ka la pynkmen ïa ki nongshong shnong baroh namar da ka jingwan jong kane ka Synod, na ka liang ka tnad PWD ka la phah maramot lut baroh.
Katba na ka liang ka Balang pat ki la pynpaw ka jingsngewnguh ïa baroh kiba la don bynta ban pynurlong ïa kitei ki jingïarap khamtam ïa u Bah Hamlet Dohling, MLA barim ka thaiñ uba dang ïai bteng ban ïarap haduh mynta mynne na bynta ka jingdonkam jong ka thaiñ.

Leave A Reply

Your email address will not be published.