Mih ki paidbah ban pyrshah ba shna surok NREGS jubor ka Assam ha Langpih

0

Nongstoiñ, Naiwieng, 4: Ki nongshong shnong ka Noapara, West Khasi Hills, ki la ïamih paidbah hynnin ka sngi palei ban ieng pyrshah ïa ka jingwan shna surok MGNREGA ba beaiñ ka sorkar Assam na Noapara sha Kshaid Balwa Wari.
Ki Nong Noapara ki la leit buh ruh da ka nongujor sha ki Pulit ka Langpih Outpost, ban pyntip ïa ka jingwan shna jubor ïa ka surok job card da ka sorkar Assam na Noapara sha Kshaid Balwa Wari, kaba la dep ban pyrshah jur da u paidbah naduh u snem 2021.
La pyntip ba hynnin ka sngi ka sorkar Assam, ha ryngkat ka jingïarap ki Pulit Assam bad ki nongkyrshan ki la sdang ïa kane ka jingtei. Hynrei, la ong ba ki heh Pulit ki ïathuh ba u Incharge ka Langpih AD camp ha ryngkat ki Ophisar na Aradonga Out Post, mar mar ki la hiar sha kane ka jaka ban pynlong ïa ka jingtohkit.
Ha ka jingleit tohkit la lap ba ki Pulit ka Assam ba ïalam da u Incharge Assam PPP lem bad u Circle Officer ka Boko PS, ki la synran ïa kawei ka JCB kaba dang lur ïa ka surok ha Noapara ïa kaba la pynsangeh noh hadien, namar ka jingwan pyrshah ki paidbah kiba don hapdeng 50 haduh 80 ngut ei ei.
Ki heh Pulit ki la pyntip ba ki paidbah kim shym treh ban ïatreilang ne wat ban sngap ïa ki jingkyrpad jong ki Pulit kiba dei na Assam bad Meghalaya ruh kumjuh. Ki la ïathuh ba ha ka jingtohkit bniah, la lap ba don uwei u briew ba kyrteng u Dambar Bhatrai ba na Noapara u dei u ba wanrah ïa kane ka MGNREGA skhim, khlem da ïasyllok ïa ki nongshong shnong bad kumjuh ruh ïa u Rangbah Shnong ban shna ïa kane ka surok ka ban pynïasoh shaduh sha shnong Kyrshai. Ki ong ba dei kane kaba la pynmih ïa ka huri hura baroh.
Shuh shuh, la ïathuh ba u Rangbah Shnong ka Noapara um don jingtip eiei ïa kane lait noh tang u Secretary ka Noapara u ba don jingtip. Namar kane ka jingjia, u Circle Officer ka Boko lem bad u BDO ka Mawshynrut, ki la pynlong ïa ka jingïalang ha kaba la rai ba ki paidbah kin ïa pynlong jingïalang para ma ki, khnang ba kin ïashim rai la kane ka surok kan bteng ne pynsangeh noh bad ban rah ruh ïa kane ka kam sha ki Deputy Commissioner jong baroh ar tylli ki Jylla.
Halor ka rai ba ka dorbar Shnong Noapara, kan lum ïa ka jingïalang paidbah ryngkat ka jingïatreilang jong ki paidbah na Meghalaya bad Assam ha ka jingïadonlang ki heh ophisar na ka District bad ki pulit, kumta ka kam ka la long jai jai noh.

Leave A Reply

Your email address will not be published.