Shillong, Naiwieng, 04: Ka skulbah Martin Luther Christian University, Shillong ha ka sngi Thohdieng ka la ai sngewbha da ka Momento sha ka Shillong Press Club kum ka jingithuh ïa u synniang u bynhei jong ki nongthoh khubor kiba la don bynta ban pathai ïa ki jingtip bakongsan sha ki paidbah nongshong shnong mynba ka jylla Meghalaya ka dang don hapdeng ka jingshah lynshop ha ka jingpang khlam COVID-19.
Kane ka jingaiburom ka MLCU kadei kum ka jingsdang ïa ka University Week ba la tip kum ka Aurora.
Ha ka jingïalang kaba lyngkot kaba la long ha Shillong Press Club, la sakhi lang ka samla Wandashisha Lyngdoh, u Lemuel Debarma bad katto katne ki nongmihkhmat na ka Martin Luther Christian University (MLCU) u Secretary ka Shillong Press club u Bah Powell Sohkhlet, u Joint Secretary u Bah Martin Nongkhlaw lem bad ki nongthoh khubor.
