Rakhe dap 100 snem ka Robert Hospital, ïaroh u CM ba la pyrkhat lypa na ka bynta ka jingsumar ha ka lawei

Shillong, Naiwieng 04: U Myntri Rangbah ka jylla, u Conrad Sangma, u la ïaroh ïa ka jingïohi jngai jong ka Dr. H Gordon Robert Hospital namar ka jingpyrkhat jong ka ban tei bad pynheh ïa ka Hospital na ka bynta ka jingdonkam ïa ki snem kiban sa wan.
Ïa kane u Conrad u la pynpaw haba kren ha ka jingplie ïa ka jingrakhe dap shi spah snem jong kane ka Hopistal ba la seng da u Dr. H. Gordon Robert ha ka snem 1922.
“Kane kadei kaba ngi donkam ha kine ki sngi kaba mynta ban plan bad pyrkhat lypa na ka bynta ka jingdonkam jong ki snem kiban wan”, la ong u Myntri Rangbah. U la ong ruh ba ka Projek kaba ka Robert Hospital ka la buh ka long 50 haduh 100 Klur bad kiba kum kine ki Projek ki donkam ïa ka jingkyrshan jong ki tnad sorkar jong ka sorkar pdeng. Hynrei kum ka dak ka jingïadon bynta lem na ka bynta kane ka jingthmu ba bha jong ka Hospital, u Myntri Rangbah u la noh synñiang 20 lak tyngba ba ka CM Development Fund. U Kyrmen ruh ba da ka jingthmu ka Robert Hospital ban tei ïa kane ka building na ka bynta ban nang pynbha shuh shuh ïa ka lad jingsumar kan long ka jingïarap kaba khraw ïa ki paidbah ha ka liang ki lad jingsumar.
Ha kajuh ka por u Conrad u la pynkynmaw bad ai jingïaroh ruh ïa ka jingnoh synñiang ba radbah jong ka Balang Presbyterian ha Ri Khasi Jaiñtia naduh ha ka liang ka pule puthi ha ka koit ka khiah bad ha kiba bun kiwei pat ki bynta jong imlang sahlang. U la pynkynmaw ruh ba kumno ha ki ar snem ba ka jylla ka la mad ïa ki jingeh namar ka jingpang COVID 19, ki Doktor bad ki Nurse jong ka Robert Hospital bad kiwei de ki Hospital ha ka jylla ki la aiti met bad mynsiem da kaba buh ïa la ka jong ka jingim ha ka jingma.
U Bah Prestone Tynsong, Symbud Myntri Rangbah, u la ai ka jingïaroh bad ka jingsngewnguh namar ka jingshakri jong kane ka Hospital ha kine ki shi spah snem ba la leit bad u kyrmen ruh ba ka Hospital kan dang ïai bteng shuh shuh ka jingshakri ha kine ki shi spah snem ban dang wan. Da kaba ai khublei ïa ki nongpynïaid bad ki nongtrei ka Hospital namar kane ka jingdap shi spah snem ka jngshakrik, u Bah Prestone u la ai mynsiem ïa ki ba kin nang ïai trei kham bha shuh shuh ha ka jingshakri ïa ki briew kiba pang ba shitom.
Ha kane ka jingrakhe, u Myntri Rangbah u la kyntiew bad pynher ïa ka lama Centenary Celebration jong ka Hospital katba u Bah Mohendro Rapsang, MLA ka West Shillong bad u Bah Adelbert Nongrum, MLA ka North Shillong ki la pynher ïa ki shi spah tylli ki baloon kum ka dak ka jingkmen ha kane ka jingrakhe.
La pynïaid ïa kane ka jingrakhe da u Rev. SS Majaw, Chairman ka Governing Body ka Hospital bad la ïoh ka jingpule sdang bad duwai na u Rev. CS Suchiang bad ka jingduwai pynkyntang ïa ka jingrakhe da u Rev. NS Phawa, Senior Administrative Secretary barim ka KJP Assembly. U T.Bn Dr. R. Nongrum, Medical Superintendent u la ai ïa ki kyntien pdiang sngewbha bad la ïoh ïa ki jingrwai kyrpang da ki Nongtrei ka Hospital bad na kiwei kiwei.
Ha kane ka sngi la ïadon lang ki Administrative Secretary ka KJP Assembly, KJP Synod, ki nongkitkam Jingïaseng Kynthei, Jingïaseng Samla ka Assembly, ki nongmihkhmat na ki Presbytery bad kiwei kiwei.