Ïaroh u Myntri ka Sorkar Pdeng ïa ka Meghalaya kum ka nongtbeh sharak ïa ka skim JJM

By Mawphor News Desk On Nov 5, 2022

Shillong, Naiwieng 04: U Myntri ka Sorkar pdeng ba dei khmih ïa ka Skim Jal Shakti, u Gajendra Singh Shekhawat, u la ïaroh ïa ka jylla Meghalaya kum ka nongtbeh sharak ïa kiwei pat ki jylla jong ka Ri, ha ba phai ïa ka jingpyndonkam paka ïa ka Skim Jal Jeevan Mission (JJM). Ha ka jingwan iuh kjat jong u sha ka jylla, u la ïaroh ïa ka jinglah jong ka jylla ban pyndonkam hok ïa kane ka skim ka ba la lah ban pynïoh nong ïa shibun ki longing ha ka jylla.
Ha kaba sdang ïa ka JJM ha u bnai nailar 2019, tang 4,550 tylli ki longing ha ki thain khapsor ki la ïoh tan um ha thliew iing. Mynta la lah ban pyn biang um ha iing haduh ym duna ïa ki 2.61 lak tylli ki Longiing.
“Da kaba ïoh haduh 41.5% ka jingkiew ha ka jingsam um ha iing, ka jylla Meghalaya ka la tam ïa ka jingkheiñ ha kiwei pat ki jylla jong ka ri ka ba long tang 36%, kaba pynlong ïa ka jylla Meghalaya kum ka nuksa ne ka role model ïa kiwei ki jylla ha ka ban pyndonkam hok ïa ka skim JJM”. “Nga ngeit skhem ba ka jylla Meghalaya kan lah ban pynbiang umbam lyngba ki kor um ha man ki thliew iing ha ka jylla shuwa ban kut ka por”; la pynskhem u Shekhawat.
Katkum ka jingïohi u Shekhawat, kaba pynsngewtynnad bad pyn shlur shisha ïa kiwei ki jylla, ka long ka rukom pyntreikam ka sorkar jylla ïa ka Skim JJM, ka jylla ka ba don tang duna ïa ka shi percent ka jingdon ki thliew iing ban ïoh tan um ha iing hynrei mynta ka la lah ban pynïoh umbam ha iing haduh da ki lak tylli ki thliew iing ha ka jylla
“Tang ka jylla Meghalaya ka dei kaba la poi sha ka thong ‘Performance Incentive Grant under JJM’ na ka bynta 2 snem linter.” Kat kum ka jingkren u Shekhawat, ka Meghalaya ka dei ruh kawei ka Jylla kaba lah ban pynïoh shisha ïa ka um kaba paka bad u la ïathuh ruh ba, kumba 700 klur tyngka yn pyntreikam ban shna haduh kumba 2500 tylli ki pung um.
Une u Myntri ka Sorkar Kmie, u ka ïaroh shibun ïa ka Jylla kaba don jingthmu ban pyntreikam ïa ka ne ka skim bad u la ong ruh, ba kane ka jylla kan long ka nuksa na ka bynta kiwei pat ki jylla ha Ri.
Haba kren halor ka jingsakhi bad peit bniah jong u Shekhawat’s, u myntri Rangbah ka jylla u Conrad K Sangma u la ong, “Ka jylla Meghalaya ka dang pyrshang ban pyntreikam hok katba lah khnang ban lah ban ai jingmyntoi ïa ki ba bun. Ngi ai khublei ïa u Gajendra Singh Shekhawat na ka bynta ka jingkloi jong u ban ïarap ïa ngi ha ka ban pyntreikam ïa kane ka skim. Ki kyntien pynshlur jong u ki long shisha kiba ai mynsiem ïa ngi ban nang trei shitom shuh shuh ha ka ban pynpaka ïa kane ka skim ‘Jal Jeevan’ ban ban pynbïang shuh shuh ïa baroh ki longing ha ka jylla. Ka kynhun JJM ha ka jylla kan ym shong kli kti khlem da pynmih shisha ïa ki soh ba thiang na ka bynta ban ïoh rah biang ïa ka nam ha ka sien ka ba lai. Ngin pyrshang ban ïoh 100 % ka jingpyntreikam ïa baroh ki iing ha ka jylla.”
Kum ban shu pynkynmaw, ka President ba donburom ka Ri India, Ka Droupadi Murmu ka la pynkup burom ïa ka Meghalaya na ka bynta ka jinglah ban pyntreikam paka ïa ka JJM ha ka Ri baroh kawei . ha ka skim ‘Har Ghar Jal’ (HGJ), ka Meghalaya ka la ïoh kham hakhmat ïa ka Assam, J&K, Kerela, Manipur, Nagaland, Rajasthan, Sikkim, Tripura, Uttarakhand, Karnataka, Goa, ba kiwei kiwei ki jylla ka Ri. Ka Meghalaya ka la ïoh ïa ka HGJ status na ka bynta ki 597 ki Shnong bad kiwei pat haduh 1500 tylli ki Shnong ban ïoh 100 % ka jingring um ha iing.