Buddien ka ïing ka sem u Bah Cherish ïa ka ejahar ba mudui pyrshah ïa ki Pulit

0

Shillong, Naiwieng 04: Ka ïieng ka sem jong u Bah Cheristerfield Thangkhiew ryngkat ka jingsynran lang jong ki nongïalam ka Sur Ka Bri U Hynñiewtrep (KSKBUH) ha ka sngi Thohdieng ki la leit ban buddien na Sadar Police Station halor ka ejahar ba ki la mudui pyrshah ïa ki Pulit kiba donkti ban siat ïap ïa u nongïalam barim ka seng kieng atiar Hynñiewtrep National Liberation Council (HNLC) u Bah Cheristerfield Thangkhiew ha ka jingleit khynra ïa ka ïiengsah jong u ha ka step synñia jong ka 13 tarik, Nailar, 2021.
U nongïalam jong ka Sur Ka Bri U Hynñiewtrep (KSKBUH) u Bah Donboklang Kharlyngdoh ha ka jingïakren bad ki lad pathai khubor u la ïathuh ba kane ka jingbuddien jong ka ïieng ka sem u Bah Cherish ïa ka ejahar ba la mudui sha ki Pulit ka long shwa ba kin shim da kawei ka sienjam khnang ban pynïoh ïa ka jingbishar kaba hok na ka bynta u Bah Cherish.
U Bah Kharlyngdoh u la ïathuh ba ha ka jingleit ïakynduh ïa ka Officer-in-Charge jong ka Mawlai Police Station la bthah ïa ki ban leit ban ïakynduh ïa ki Pulit jong ka Sardar Police Station hynrei nangne la bthah kylla ïa ki ban leit mih sha Mawlai Police Station namarba kane ka Case ka hap hapoh ka jingpeit jong ka Mawlai Police Station.
“Ynda ngi la leit mih sha Sadar Police Station la pyntip ïa ki bahaïieng hasem ba ka tnat Pulit ka la thung bujli da u Dy. Superintendent of Police (Dy.SP) u Subir Sangma ha ka jaka jong u Bah Jeff Suting uba u la shah pynkhamti kum u Investigating Officer (IO) ban pynlong ïa ka jingtohkit namarba u Bah Jeff Suting u la leit sha South Sudan.
“Ka Sur u Paidbah ka Bri u Hynñiewtrep kam pat shong kli kti katba ki bahaïieng hasem jong u Bah Cherish kim pat ïoh ïa ka jingbishar kaba hok,” la ong u Bah Kharlyngdoh bad bynrap, “kumba ki san tylli ki sengbhalang lyngba ka Save Hynñiewtrep Mission (SHM) ki la dawa ïa ka Sorkar ban pynshitom ïa ki Pulit kiba donkti ha ka jingsiat ïap ïa u Bah Cherish, na ka liang jong ngi, ruh ngin ïai buddien halor kane ka jingdawa na ka Sorkar Jylla.”
Shuh shuh u la ong, ba ka ïieng ka sem u Bah Cherish bad ka kynhun ka Sur ka Bri u Hynñiewtrep ki don ka jingkyrmen kaba skhem ba u Subir Sangma uba la shimti mynta kum u Investigating Officer (IO) un wanrah ïa ka jingtohkit kaba pynhun ïa ka ïieng ka sem bad ïa ki paidbah.

Leave A Reply

Your email address will not be published.