Nongpoh, Jymmang 16: Ki bor synshar jong ka Ri-Bhoi District ryngkat ka jingïatreilang bad ki Pulit ha ka sngi Thohdieng khang khyrdep ïa ka khyrdop khrong pisa kaba la pynïeng beaiñ da ka Khasi Hills Autonomous District Council (KHADC) ha ka shnong Umdihar, harud surokbah National Highway 6.
Kane ka khyrdop ka la sdang ban khrong pisa na ki kali kit mar bam bad kiwei ki kali kiba ïaid lyngba ka surok.
La ong ba ka khyrdop khrong khajna ka dei kaba dang shu sdang pynïeng, bad ka jinglum pisa beaiñ na ki kali kit mar ka la pynlong ïa u Magistrate bad ki bor pulit ban leit khang noh halor ka hukum kaba la pynmih da u Deputy Commissioner ka Ri-Bhoi District.
Kum ban shu pynkynmaw, ha u snem 2023 ruh ki bor District kila la dep ban khang noh ïa kawei ka khyrdop khrong khajna jong ka KHADC ha ka juh ka jaka. Hynrei kaba sngew lyngngoh ka long ba mynta pat, hapoh ka jinglamkhmat jong ka party VPP, ka KHADC ka la pynïeng biang sa kawei ka khyrdop ban lum na ki kali kit mar.
Ha kaba ïadei bad kane, u Deputy Commissioner ka Ri-Bhoi District, u Abhilash Baranwal, u la ong ka KHADC ne kino kino ki tnad kim lah ban pynïeng khyrdop khrong khajna ha surok bah National Highway bad surok PWD khlem da ïoh jingbit (NOC) na ki bor ba dei khmih. Kumta, halor katei ka nongrim, ki bor District kila shim khia ban khang noh ïa katei ka khyrdop ha Umdihar hadien bala don kiba ujor.
