Mawkyrwat, Jymmang, 26: Ka Mawten Sports Club bad ka Seven United Sports & Cultural Club ha ka lympung ïalehkai kynjatbol ba la tip kum ka Meghalaya State League (MSL) ki la ïa khaid mar 0 kol hapoh madan Artificial Turf, MDSA, South West Khasi Hills District.
Ha ka jingïalehkai hapdeng ka Mawten SC pyrshah ïa ka Seven United SCC ka la long ka jingïalehkai kaba itynnad bad ka la pynhun ïa ki nongwan peitkai namar ha ka jingïalehkai jong ka kyllastep baroh ar tylli ki kynhun ki la ïa trei shitom ban ïoh ban ïa thep kol hynrei hapdeng kata kim shem lah ban ïa pynkhih jar wat mar kawei ruh.
Haba wan biang ha ka jingïalehkai ha ka kyllamiet ruh watla ki ‘rangïalehkai jong baroh ar kynhun ki la sei ïa la ki sap ki phong jong ki ruh hynrei ka Mawten SC bad ka Seven United SC kim shym la lah ban urlong namar dei na ka jingtbit ki nongapkol bad ki nongap nadien ha kaba haduh ba kut jong regular time ruh ym shym la lah ban ïoh ban ïa pynkhih jar.
Namarkata, haba phai hapdeng kine ki ar tylli ki kynhun ïalehkai ka Seven United SC napoh Eastern West Khasi Hills District ka la ïoh ban ïalehkai haduh 4 sien mynta ka sngi ïoh 8 poiñ katba ka Mawten SC na South West West Khasi Hills District ka la ïoh ban ïalehkai 3 sien bad ïoh 4 poiñ.
Kumta ka Mawten SC kan sa ïoh ban ïa lehkai biang sa 2 sien ha kane ka jingïalehkai kynjatbol jong ka MSL ha Mawkyrwat, South West Khasi Hills District.
