Ha ka sien nyngkong paw ka khynnah na ka skul Sawsymper ha ka Top 20 SSLC

Sawsymper, Jymmang 26: Ka long kaei kaei ka jingsarong na ka bynta ka dong ka thaiñ ha kaba ha ka sien ba nyngkong ba ka skul na ka thaiñ Sawsymper ka la lah ban pynmih ïa ki khynnah skul ba don hapoh ka Top 20 jong ka SSLC ba la pynïaid da ka Meghalaya Board of School Education (MBOSE).
Lah ban kdew ba ka khynnah kaba paw ha ka Top 20 ka dei kaba la tip kyrteng kum ka samla Jessica Marweiñ kaba dei ka khun jong ka kong Daïahun Marweiñ bad u bah Arbiros Lyngdoh na ka shnong Kmawanrum, East Khasi Hills District bad ka pule ha ka skul St. Ferrendo Secondary School, Sawsymper bad ka la ïoh rung ruh ha ka kyrdan ba 20 jong ka Class X (SSLC) ba la pynïaid da ka MBOSE.
Haba ai jingkren lyngkot na ka samla Jessica Marweiñ nyngkong eh ka la pynpaw ka jingnguh ïa U Blei Uba la lam lynti ha ki por baroh ha ka jingim jong ka namar khlem ma U kan nym lah ban leh ei ei ruh em. Ha kajuh ka por ka la pynpaw ruh ka jingkhublei na ka bynta ki kmie ki kpa ba dei lyngba ka jingaimynsiem jong ki ruh ba ka sa poi haduh kane ka thong, namar ki kmie ki kpa ki ju ai ki jingsneng jingkraw ha manla ka sngi bad kyrpang ruh na ka bynta ki nonghikai kiba la pynlut ka por ka bor ha ki kynta jong ka jinghikai hapoh skul bad kiba la ai ruh ki jingtip bad kdew lynti kumno ban pule ïa ki kot ki sla.
Namarkata, lyngba ka jingpoi jong ka sha kane ka thong, ka samla Jessica Marweiñ ka la ai mynsiem ïa ki para khynnah ba haba ki don ha ki jingpule ki dei ban pynlut ka por khambun ha kane ka bynta ym ha kiei kiei ki bym myntoi namar ka jingpule hi ka dei kawei ka bynta ban poi sha kliar jong u lum ba phyrnai jong ka jingim. “Kum ki khynnah skul haba ki don ka jingpule ki dei ban don ka thong, ka jingkut jingmut, ka jingtrei shitom bad ka jinglen-lade”, ong ka samla Jessica Marweiñ.
Ha kane ka sngi, na ka liang jong ka KSU Sawsymper Circle hapoh la jingïalam jong u samla Belingstar Lyngkhoi, President KSU Sawsymper Circle, u samla Macdonald Marbaniang, General Secretary KSU Sawsymper Circle, u samla Arkher Marweiñ, Education Secretary KSU Sawsymper Circle haka jingïadon ryngkat u samla Jiedskhem Nongsiej,nGeneral Secretary KSU South West Khasi Hills District bad kiwei kiwei ki dkhot ka seng ki la hiar sha kane ka skul ban ai khublei ïa ki nonghikai kane ka skul bad ban ai mynsiem ruh ïa ka samla Jessica Marweiñ kaba la kynjoh sha ka kyrdan watla ka la mih na ka skul ba kham kyndong ruh kaba la long ruh kum ka history ïa ka dong ka thaiñ Sawsymper baroh kawei.
Ha kajuh ka por ka seng ka ai ka jingpynshlur ruh ïa kiwei ki samla bad khynnah pule ka dong ka thaiñ ba ki dei ban trei shitom namar ym don kaei kaei ka bym lah lada ngi don ïa ka mynsiem ïa khun, minot bad trei shitom.